«Արմէնփրէս».- ՀՀ ազգային անվտանգութեան ծառայութիւնը, հետամուտ ըլլալով օտարերկրեայ պետութիւններու յատուկ ծառայութիւններուն հետախուզական քայքայիչ գործունէութեան դէմ պայքարին եւ տեղեկատուական անվտանգութեան ոլորտէն ներս ՀՀ օրէնքով իրեն վերապահուած գործողութիւններու ու լիազօրութիւններու իրականացման, կը շարունակէ բացայայտել Ատրպէյճանի յատուկ ծառայութիւններու յանցաւոր նկրտումները, ինչպէս նաեւ հակազդել համացանցի տարբեր հարթակներու վրայ ատրպէյճանցի օգտատէրերու կողմէ շարունակական բնոյթ կրող հակահայկական եւ ՀՀ զինեալ ուժերու վարկաբեկման շարժումներուն:
ՀՀ ԱԱԾ մամուլի կեդրոնի տարածած հաղորդագրութեան մէջ նշուած է․
«Յիշեալ ուղղութեամբ իրականացուող առարկայական-հետախուզական նախաձեռնութիւններու տուեալներէն ի յայտ եկած է, որ Ատրպէյճանի Հանրապետութեան յատուկ ծառայութիւններու «Արհեստավարժ Հետախոյզները», հաւատարիմ մնալով իրենց բնորոշ պարզունակ գործելաոճին եւ օգտագործելով արդի տեղեկատուական ճարտարագիտութեան կարելիութիւնները, կը շարունակեն համացանցի վրայ գրանցել արտերկրի մէջ բնակող հայերու անուններով կեղծ էջեր եւ ներկայանալով որպէս գործարար-բարերարներ, կամ ՀՀ Զինեալ Ուժերու նախկին զինուորական ծառայողներ, ծանօթութիւններ կը հաստատեն հայ զինուորական ծառայող-օգտատէրերու, կամ անոնց հարազատներուն հետ ու յարաբերութիւններու ընթացքին ռազմական բնոյթի տեղեկութիւններ կը կորզեն:
Ատրպէյճանի Հանրապետութեան յատուկ ծառայութիւններու գործողութիւնները այնքան նոյնաբովանդակ եւ պարզունակ են, որ ՀՀ ԶՈՒ զինուորական ծառայող-օգտատէրերը անոնց առաջին իսկ արտայայտութենէն կը հասկնան, որ գործ ունին ատրպէյճանական «Հզօր Հետախոյզ»ի հետ եւ կը դադրեցնեն անոնց հետ յարաբերութիւնները ու անմիջապէս կ’իրազեկեն համապատասխան մարմինները:
Ազգային անվտանգութեան ծառայութիւնը անգամ մը եւս կը յորդորէ ՀՀ քաղաքացիները` յատկապէս զինուորական ծառայողները, հեռու մնալու ընկերային ցանցերու վրայ անծանօթ օգտատէրերու հետ յարաբերութիւններէն եւ չքննարկելու զինուորական ծառայութեան վերաբերող նիւթեր, իսկ նման իրադրութեան մէջ յայտնուած անձերէն եւ զինուորական ծառայողներէն, իրենց շահերէն մեկնելով, կը խնդրէ անյապաղ Ազգային անվտանգութեան ծառայութիւն դիմել»: