Կիրակի, 6 Մայիս 2021-ին, «Ուաթան Անլայն» հաղորդեց, որ Սուրիոյ Արտաքին Գործոց Նախարարութիւնը հանդէս եկաւ հաղորդագրութեամբ, խստիւ դատապարտելով հոլանտական եւ ֆրանսական պատուիրակութիւններուն ապօրինաբար մուտք գործելը Սուրիա, համաձայնաբար քրտական ՔԱՍԱՏ-ի զինեալ խմբաւորումներուն հետ, որոնց կայք հաստատած շրջանները թրքական համակարգին տիրապետութեան տակ կը գտնուին եւ գրեթէ թրքացած շրջաններ են։ Հաղորդագրութեան մէջ Նախարարութիւնը ըսաւ. «Սուրիոյ դէմ պատերազմող կարգ մը երկիրներու ներկայացուցիչները միջազգային օրէնքին հակասող ընթացքներ կ՚ունենան եւ կը խախտեն Սուրիոյ Հանրապետութեան գերիշխանութիւնը։ Հոլանտական պատուիրակութիւնը ապօրինաբար մուտք գործեց Սուրիա, այն պատրուակով, թէ ան պիտի բանակցի ՔԱՍԱՏ-ի մօտ ՏԱՀԵՇ-ի զինեալ ահաբեկչական խմբաւորումէն ձերբակալուած անդամներ ազատ արձակելու շուրջ։ Միւս կողմէ ֆրանսական պատուիրակութիւն մը դարձեալ ՔԱՍԱՏ-ի հետ համաձայնաբար ապօրինաբար մուտք գործեց Գամիշլի, Սուրիոյ դէմ մղուած գրոհին մասնակցելու նպատակով»։ Նախարարութիւնը եզրափակելով ըաաւ. «Սուրիոյ Հանրապետութիւնը խստիւ կը դատապարտէ նման ընթացքներ եւ կը շեշտէ, որ Սուրիան պիտի վերականգնէ իր հսկողութիւնը սուրիական բոլոր հողերուն վրայ եւ թրքական ու ամերիկեան բռնատիրութենէն պիտի ձերբազատէ զանոնք, առաջին հերթին դուրս մղելով անոնց գործակալները, ինչպէս ՔԱՍԱՏը եւ այլ զինեալ ահաբեկչական խմբաւորումներ» ։