Երեքշաբթի, 8 Յունիս 2021-ին, Սուրիոյ նախագահութեան պաշտօնական կայքը հաղորդեց, որ 15 տարուան աշխատանքէն ետք, Սուրիոյ մէջ փոքրիկներու արեան ցողունային բջիջներու փոխպատուաստման եւ բջիջներու բուժման կեդրոնը հիմնուեցաւ։
Սուրիոյ առաջին տիկին Ասմա ալ Ասատ այցելեց կեդրոն եւ ստուգեց աշխատանքներուն ընթացքը նախքան բացումը, որ տեղի պիտի ունենայ յառաջիկայ շաբաթներուն, ընկերակցութեամբ Սուրիոյ բարձրագոյն կրթութեան նախարարին։
Արեան քաղցկեղ ունեցող եւ տկար դիմադրողականութեամբ ծնող փոքրիկներուն յատուկ բուժման կեդրոնը օժտուած է բժշկական արդիական սարքաւորումներով։ Անոր բոլոր բաժինները հականեխուած են, որպէսզի փոքրիկներուն առողջ միջավայր տրամադրուի եւ գործողութիւնները յաջող ընթանան։
Կեդրոնը այնպէս մը ձեւաւորուած է, որ փոքրիկները բժշկական մեկուսացման ենթարկուին, իրենց ընտանիքներուն կողքին մնալով։