«Հայաստան» դաշինքը կը հաղորդէ, որ նախընտրական քարոզարշաւի առաջին օրը (7 Յունիսը) անցած է Սիւնիքի մարզին մէջ: Դաշինքի առաջնոդները` ՀՀ երկրորդ նախագահ Ռոպերթ Քոչարեան, «Վերածնուող Հայաստան» կուսակցութեան նախագահ Վահէ Յակոբեան, ՀՅԴ ԳՄ հայաստանեան գրասենեակի ղեկավար Իշխան Սաղաթէլեանն ու խումբի անդամները հանդիպումներ ու հանրահաւաքներ ունեցած են Ագարակի, Մեղրիի, Քաջարանի եւ Կապանի մէջ:

Ընտրողներու հետ հանդիպումներու ընթացքին քննարկուած են Հայաստանի, մասնաւորապէս, Սիւնիքի մարզի անվտանգութեան, Արցախի հետ յարաբերութիւններու, գերիներու վերադարձի մասին հարցերը: Ընտրողներուն նաեւ կը հետաքրքրէր, թէ տնտեսական ճգնաժամէն դուրս գալու ինչ ուղիներ կը տեսնէ «Հայաստան»  դաշինքի խումբը:
Նախագահ Քոչարեան սպառիչ պատասխաններ  տուած է բոլոր հարցումներուն` վստահեցնելով, որ ճիշդ եւ գրագէտ կազմակերպուած աշխատանքի հետեւանքով բարձրացած հարցերը միանգամայն լուծելի են: Իսկ «Հայաստան» դաշինքը  այն խումբն է, որ ունի անոր համար անհրաժեշտ գիտելիքն ու փորձը:

«Հայաստան» դաշինքի նախընտրական քարոզարշաւի երկրորդ օրը (8 Յունիս) անցած է Սիւնիքի եւ Վայոց Ձորի մարզերուն մէջ: Դաշինքի առաջնոդները` ՀՀ երկրորդ նախագահ Ռոպերթ Քոչարեան, «Վերածնուող Հայաստան» կուսակցութեան նախագահ Վահէ Յակոբեան, ՀՅԴ ԳՄ հայաստանեան գրասենեակի ղեկավար Իշխան Սաղաթէլեան, ՀԱՊԿ նախկին գլխաւոր քարտուղար Իւրի Խաչատուրովն ու խումբի անդամները հանդիպումներ ու հանրահաւաքներ ունեցած են Գորիսի, Սիսիանի, Ջերմուկի, Վայքի ու Եղէգնաձորի մէջ:

Ընտրողներու հետ հանդիպումներու ընթացքին քննարկուած են Հայաստանի անվտանգութեան, պատերազմին կրած պարտութեան, զոհուած եւ վիրաւորուած զինուորներու ընտանիքներուն փոխհատուցման, Ամուլսարի հանքի բացման, աշխատատեղերու ստեղծման հետ առնչուած հարցեր:

«Հայաստան» դաշինքի առաջնորդները վստահեցուցած են ընտրողներուն, որ իրենց խումբը ունի այն փորձն ու գիտելիքները, որոնք անհրաժեշտ են երկիրը այս անդունդէն հանելու համար: