Երկուշաբթի, 5 Յունիս 2021-ին, «Շամ Թայմզ» հաղորդեց, որ Սուրիոյ վարչապետ Հուսէյն Արնուս Թարթուսի նահանգապետարանէն ներս գումարած ժողովին ընթացքին շեշտեց, որ սուրիական կառավարութեան որդեգրած եւ մօտօրէն որդեգրելիք միջոցները պիտի նպաստեն կառավարական պաշտօնեաներուն եւ ընդհանուր առմամբ քաղաքացիներուն կենցաղային իրավիճակին բարելաւման։ Վարչապետը յայտնեց, որ ներկայիս տնտեսական դժուար պայմաններուն լոյսին տակ ամենավնասուող խաւը պաշտօնեաներն ու հանգստեան կոչուածներն են։ Ժողովին ընթացքին Արնուս յայտնեց, որ ներկայիս կառավարութիւնը քաղաքացիին առօրեայ ապրուստին առնչուող կարգ մը հարցերու լուծման գծով լուրջ սերտողութիւն կը կատարէ։ Ան աւելցուց, որ կառավարութիւնը առաջնահերթութիւն կը նկատէ ելեկտրականութեան կայուն ապահովման հարցը եւ այս գծով տարբեր միջոցներու կը դիմէ։