Չորեքշաբթի, 15 Յուլիս 2021-ի երեկոյեան Ճեզիրէի Առաջնորդական Փոխանորդ Հոգշ. Տ. Լեւոն Վրդ. Եղիայեան Առաջնորդարանի դահլիճէն ներս հանդիպում ունեցաւ ՀՄԸՄ-ի Վարչութեան հետ։ Հանդիպումին ներկայ էին Արժ. Տ. Պսակ Քհնյ. Պէրպէրեան, ՀՄԸՄ-ի նորընտիր Շրջ. Վարչութեան անդամ եղբ. Միհրան Տիգրանեան եւ ՀՄԸՄ-ի միջմասնաճիւղային մրցաշարքի պատուիրակութիւնը։ Հոգեշնորհ հայր սուրբը բարձր գնահատեց Գամիշլի Մասնաճիւղի ՀՄԸՄ-ական քոյր-եղբայրները, որոնք հակառակ դժուար պայմաններուն մասնակցեցան մրցաշարքին եւ ֆութպոլի ախոյեան հանդիսացան։ Վարչութեան ատենապետ բժիշկ Անդրանիկ Սարգիսեան իր կարգին շնորհակալութիւն յայտնեց հոգեշնորհ հայր սուրբին, իսկ ՀՄԸՄ-ի մեծ ընտանիքին՝ յարատեւ վերելք եւ նորանոր յաղթանակներու նուաճում։ Պատուիրակութեան խօսքը արտասանեց եղբ. Խաչիկ Մելքոնեան, որ անդրադարձաւ Գամիշլի Մասնաճիւղի դրական եւ տպաւորիչ մասնակցութեան։ Աւարտին հոգեշնորհ Հայր սուրբը եռագոյն երիզներով պարգեւատրեց ախոյեան խումբը, որ իր բաժակն ու խումբի տարազը նուիրեց հայր սուրբին։ Խանդավառ եւ ուրախ մթնոլորտի մէջ, յիշատակելի խմբային նկարով հանդիպումը հասաւ իր աւարտին։