Անցնող օրերուն, քուէթաբնակ բարերար տիար Կիրակոս Գույումճեան հեռաձայնային կապ հաստատելով Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեանի հետ, իր շնորհաւորութիւնները փոխանցեց հալէպահայ վարժարաններու 12-րդ կարգի պետական քննութիւններուն յաջողութիւն արձանագրած հայ աշակերտներուն, անոնց մաղթելով յաջողութիւն եւ յարատեւութիւն՝ յառաջիկայ օրերուն տեղի ունենալիք լրացուցիչ քննութիւններուն: Յիշենք, որ քուէթաբնակ հալէպահայ բարերար Կիրակոս Գույումճեան նախորդ տարիներուն նման, այս տարի եւս «Ներսէս Շնորհալի» ուսումնական մրցանակով պիտի պարգեւատրէ պաքալորիայի պետական քննութիւններուն Հալէպի հայկական վարժարաններուն մէջ առաջին երեք բարձրագոյն նիշերը ապահովող հայ ուսանողները: Առաջնորդ Սրբազան Հայրը գնահատեց տիար Գույումճեանի այս բարեսիրական նախաձեռնութիւնը, որ կը ձգտի ուսումնատենչ աշակերտները քաջալերել եւ անոնց մէջ մրցակցութեան ոգին բարձր պահել: Հակառակ պսակաձեւ ժահրի համաճարակին պատճառած համաշխարհային տնտեսական դժուարին պայմաններուն, տիար Կիրակոս Գույումճեան այս տարի եւս յանձն կ՚առնէ գործադրել այս մրցանակը։ Պետական լրացուցիչ քննութիւններուն արդիւնքները յայտարարուելէ ետք, յիշեալ մրցանակին տուչութիւնը պիտի կատարուի Առաջնորդ Սրբազան Հօր ձեռամբ: