ՄԻՋԱԶԳԱՅԻՆ
ՌԷԱԼ ՄԱՏՐԻՏ ՉԵՄՓԻԸՆԶ ԼԻԿԻ ԲԱԺԱԿԱԿԻՐ ԴԱՐՁԱՒ
Պատմութեան մէջ 15-րդ անգամ ըլլալով Սպանիոյ արքայական ակումբը՝ Ռէալ Մատրիտը յաջողեցաւ ձեռք ձգել Չեմփիընզ Լիկի բաժակը, աւարտական մրցումին 2 – 0 արդիւնքով պարտութեան մատնելով Գերմանիոյ Պորիսիա Տորթմոնտը: Չեմփիընզ Լիկի եզրափակիչ հանդիպումը տեղի ունեցաւ Լոնտոնի «Ուեմպլի» մարզադաշտին վրայ: Առաջին կիսախաղին, Տորթմոնտի խաղացողները մեծ ճնշում բանեցուցին մրցակիցին վրայ եւ քանի մը առիթով իսկական կոլային պահ ստեղծեցին Քուրթուայի դարպասին վրայ, բայց չկրցան հասնիլ իրենց նպատակին։ 49-րդ վայրկեանին, Քրոս, որ վերջին խաղացողն էր Ռէալի տարազով, կրնար բանալ խաղի հաշիւը, սակայն անոր հարուածած գնդակը Կոփել մատներուն ծայրով հեռացուց։ Մօտ 20 վայրկեան խումբերը պարբերաբար սպառնացին փոխադարձ դարպասներուն, սակայն 74-րդ վայրկեանին Թոնի Քրոսին բարձրացուցած անկիւնային հարուածէն օգտուելով, Տանի Քարուահալը գլուխով նշանակեց Ռէալի առաջին կոլը, որմէ ետք Անչելոթիի խաղացողները շարունակեցին իրենց յարձակումները մինչեւ 83-րդ վայրկեան, ուր մատրիտցիները կրկնապատկեցին արդիւնքը շնորհիւ Վինիսիուս Ժունիըրին: Յիշեցնենք, որ այս խաղը ակումբային մակարդակով վերջինն էր ինչպէս Թոնի Քրոսին, նոյնպէս ալ Տորթմոնտի ֆութպոլիստ Մարքօ Ռոյսի համար, որ խաղադաշտ մուտք գործեց 72-րդ վայրկեանին:
ՏԱՆԻ ՔԱՐՈՒԱՀԱԼ ԼԱՒԱԳՈՅՆ ԽԱՂԱՑՈՂ ԴԱՐՁԱՒ
Ռէալ Մատրիտի պաշտպան Տանի Քարուահալ դարձաւ Չեմփիընզ Լիկի եզրափակիչ հանդիպումի լաւագոյն խաղացողը։ Այս մասին պաշտօնապէս յայտարարութիւն կատարեց ՈւԵՖԱ-ի մամլոյ ծառայութիւնը։
32-ամեայ սպանացին 74-րդ վայրկեանին գլխու հարուածով բա-ցուած յայտարարեց Ռէալին հաշիւը: Այս կոլը Քարուահալին համար առաջինն էր Չեմփիընզ Լիկի 2023-2024 թուականի մրցաշրջանին։
ԱՆՉԵԼՈԹԻ ՉԵՄՓԻԸՆԶ ԼԻԿԻ ՀԻՆԳ ՏԻՏՂՈՍԻ ԱՐԺԱՆԱՑՈՂ ՄԻԱԿ ՄԱՐԶԻՉՆ Է
Ռէալ Մատրիտի իտալացի գլխաւոր մարզիչ Գարլո Անչելոթի Չեմփիընզ Լիկի գաւաթը 5 անգամ նուաճած միակ մարզիչն է պատմութեան մէջ: Լոնտոնի Ուեմպլի մարզադաշտին վրայ տեղի ունեցած եզրափակիչին, Արքայական ակումբը սպանացի պաշտպան Քարուահալի եւ պրազիլցի յարձակող Վինիսիուս Ժունիըրի կոլերուն շնորհիւ պարտութեան մատնեց Տորթմոնտը եւ նուաճեց Եւրոպայի ակումբներու բարձրագոյն տիտղոսը: Անչելոթին երրորդ անգամ նուաճեց այս տիտղոսը Ռէալին հետ (2014, 2022, 2024)։ Ան երկու անգամ նոյն տիտղոսին արժանացած էր Միլան խումբին հետ՝ 2003, 2007 թուականներուն: