Ամառնային եղանակը, մարդու մարմինին վրայ բարերար ազդեցութիւն ունենալով մէկտեղ կրնայ յառաջացնել առողջական վիճակի տարաբնոյթ խանգարումներ, յատկապէս երբ օդի ջերմաստիճանը կը գերազանցէ մարդու բնական գործունէութիւնը ապահովող միջին ջերմաստիճանային ցուցանիշը:

Տաք եղանակին մարդու մարմինին վրայ մեծ ազդեցութիւն ունեցող հիմնական բացասական գործoններն են՝ օդի բարձր ջերմաստիճանը՝ անդրմանիշակագոյն ճառագայթը: Անդրմանիշակագոյն ճառագայթներու հիմնական աղբիւրը արեւն է:  Ան պարզապէս քիչ քանակով  կարեւոր դերակատարութիւն ունի մարդու կենսագործունէութեան վրայ, քանի որ կը խթանէ դիմադրողական համակարգի գործունէութիւնը, ոսկորներու  ձեւաւորումը, նիւթափոխանակութեան գործընթացները եւ այլն:

Ամռան տաքէն պաշտպանուելու եւ չանհանգստանալու համար պայման է որդեգրել որոշ նախազգուշութիւններ: Ամռան տաքը առողջական լուրջ հարցեր կը ստեղծէ յատկապէս տարեցներուն, երեխաներուն եւ հիւանդ անձերուն մօտ:

Ուստի անհրաժեշտ է.

Օրուան տաք ժամերուն, երբ արեւը կիզիչ է, շատ լաւ փակել փեղկերն ու պատուհանները: Իսկ օրուան զով ժամերուն՝ առաւօտեան եւ երեկոյեան, կրկին բանալ զանոնք՝ տան օդը մաքրելու եւ թարմացնելու համար:

* * *

Առաստաղը խոշոր հովահար մը հաստատել. նախ՝ նուազ ծախսալից է, քան օդափոխիչը, երկրորդ՝ նուազ զօրաւոր եւ վնասակար: Հովահար հաստատելու պարագային նկատի ունեցէ՛ք սենեակին մեծութիւնը:

***

Նախապատուութիւնը տալ գաղջ կամ պաղ լոգանքներուն եւ բաղնիքը տաք շոգիով չլեցնել:

* * *

Առաւօտեան՝ ժամը 11:00-էն մինչեւ յետմիջօրէի ժամը 4:00-ը տունէն դուրս չելլել եւ ինքզինք չպարզել արեւուն ճառագայթներուն:

* * *

Տան մէջ զով անկիւն մը չունենալու պարագային, ջանալ ժամանակը անցընել զովացուած վայրերու մէջ՝ հանրախանութներ, շարժապատկերի սրահներ, ցուցասրահներ եւ այլն…

* * *

Օրուան մէջ տունէն դուրս ակնոց եւ գլխարկ կրել եւ անպայման շիշ մը ջուր վերցնել:

* * *

Օրուան ընթացքին քանի մը անգամ ցնցուղ (տուշ) ընդունիլ եւ բոյսերը ջրելու սփրէյով դէմքն ու անդամները զովացնել:

Առատ ջուր խմելը, բաց գոյնի հագուստներ կրելը, գաղջ ջուրով լոգանքը, զովացուած վայրեր այցելելը, օրուան տաք ժամերուն դուրսերը չթափառիլը լաւ սովորութիւններ են ամռան տաքին տոկալու եւ չհիւանդանալու համար: Ասոնց կողքին, սակայն, սննդագէտները կը յանձնարարեն վերատեսութեան ենթարկել ճաշացուցակը եւ հրաժարիլ որոշ ուտելիքներէ: Այսպէս տաք օրերուն խուսափինք՝

Իւղոտ ուտելիքներէն, քանի որ անոնք մարսուելու համար յաւելեալ ճիգ կը պահանջեն մեր մարմնէն, ինչ որ իր կարգին կը բարձրացնէ մարմնին ջերմաստիճանը:

* * *

Կարմիր միսէն, քանի որ այնպէս, ինչպէս իւղոտ կերակուրը, կարմիր միսը եւս նոյն անպատեհութիւնը կը ներկայացնէ: Հետեւաբար նախապատուութիւնը տանք հաւեղէնին եւ ձկնեղէնին…

Միզամուղ խմիչքներէն, որոնք կը նպաստեն մարմնին ջրազրկման: Այսպէս չափաւորենք թէյը, սուրճը, գարեջուրը եւ նախապատուութիւնը տանք սովորական ջուրին:

* * *

Շաքարէն եւ ոգելից ըմպելիներէն, ասոնք եւս հակում ունին մարմնին ջերմաստիճանը բարձրացնելու: Տաք օրերուն հրաժարինք աղանդերներէն, պաղպաղակէն, պտուղի հիւթերէն եւ նախապատուութիւնը տանք թարմ պտուղներուն: Իսկ բաժակ մը խմիչք խմելու պարագային բաւարարուինք մէկ գաւաթ գարեջուրով:

* * *

ՆԱԽԱՊԱՏՈՒՈՒԹԻՒՆ ՏԱՆՔ բանջարեղէններուն եւ կաթնեղէնին, որոնք առատ ջուր կը պարունակեն եւ մեր գործարանները յաւելեալ ճիգի մէջ չեն դներ:

Անշուշտ չմոռնանք ջուրին կարեւորութիւնը, ամռան տաք օրերուն ջուրի սպառումը պէտք է հասնի մինչեւ 2 լիթրի: Ջուր պէտք է խմենք, նոյնիսկ եթէ ծարաւ չենք զգար: