– Հալէպի փինկ-փոնկի ախոյեանութեան մրցումներուն, Սըքէք խումբի խաղացող Յովիկ Միսաքեան տիրացաւ Հալէպի տղոց երէցներու ախոյեանութեան: 14 տարեկան Յովիկը իր մասնակցութիւնը բերաւ երէցներու մրցումներուն եւ կրցաւ ներկայանալ բարձրորակ  խաղարկութեամբ: Յովիկին հետ մրցողները 25 եւ վեր տարեկան խաղացողներ էին:

–  Անցեալ շաբթուան ընթացքին Դամասկոսի մէջ տեղի ունեցաւ Սուրիոյ պասքեթի եւ ֆութպոլի ախոյեանութիւններու արհեստավարժութեան օրէնքները սահմանելու խորհրդաժողովը, որուն ընթացքին քննարկուեցան յառաջիկայ տարեշրջանի մրցաշարքի օրէնքներն ու պայմանները, ինչպէս նաեւ սահմանուեցաւ տարբեր ակումբներէ փոխադրուելու խաղացողներու թիւը:

Սպանիոյ ախոյեան եւ Չեմփիընզ լիկի գաւաթակիր Ռէալ Մատրիտ նուաճեց Եւրոպայի Սուփըր գաւաթը: Լեհաստանի մայրաքաղաք Վարշաւայի մէջ տեղի ունեցած խաղին, իտալացի Գարլո Անչելոթիի գլխաւորած խումբը տիտղոսը վիճարկեց Եւրոպայի լիկի գաւաթակիր, իտալական Աթլանթայի հետ եւ յաղթեց 2 – 0 արդիւնքով։ 59-րդ վայրկեանին, հանդիպման հաշիւը բացուած յայտարարեց  ուրուկուէյցի կիսապաշտպան Վալվերտին, որուն կոլային փոխանցումը կատարեց պրազիլցի յարձակող Վինիսիուս Ժունիըր։ 68-րդ վայրկեանին, անգլիացի կիսապաշտպան Ճուտ Պելինկհամէն փոխանցում ստանալով Ֆրանսայի հաւաքականի 25-ամեայ յարձակող Քիլիան Մպափէ նշանակեց իր առաջին կոլը արքայական խումբին հետ:  Աւելցնենք, որ Ռէալ 6-րդ անգամ ըլլալով կը  նուաճէ Եւրոպայի սուփըր գաւաթը։ Նախորդ անգամ ան նուաճած էր զայն 2022-ին։

ՄՊԱՓԷ  ԻՐ ՄԱՐԶԱՇԱՊԻԿԸ ՆԱՏԱԼԻՆ ՆՈՒԻՐԵՑ

Սպանիոյ Ռէալ Մատրիտ խումբի նորեկ յարձակող Քիլիան Մպափէ  «Լա Լիկա»-ի իր առաջին հանդիպումէն ետք, անձնական մարզաշապիկը նուիրեց սպանացի թենիս խաղացող Ռաֆայէլ Նատալին:  18 Օգոստոսին, մատրիտեան ակումբը Սպանիոյ առաջնութեան առաջին փուլի մրցումներուն մրցակից ունեցաւ Մայորքան:  14-րդ վայրկեանին Ռէալի կոլին հեղինակը դարձաւ Ռոտրիկոն, իսկ հիւրընկալ խումբը իր հաւասարութեան կոլը նշանակեց 56-րդ վայրկեանին: