-Կիրակի օր Հալէպի մարզական դաշնութիւնը պարգեւատրեց Հալէպի եւ Սուրիոյ փինկ-փոնկի ախոյեան Սըքաք խումբի խաղացող  Յովիկ Միսաքեանը: Պարգեւատրման արարողութեան ներկայ եղաւ Հալէպի մարզական գրասենեակի նախագահ Մազէն Պէյրամ եւ Հալէպի փինկ-փոնկի դաշնութեան պատասխանատու Ուաճիհ Սաքքա:

-Սուրիոյ պասքեթի աղջկանց ախոյեանութեան առաջին փուլի մրցումներու շրջագիծէն ներս, ՀՄԸՄ-ի աղջկանց

կազմը  ծանր պարտութիւն մը արձանագրելով 74 – 38 արդիւնքով պարտութեան մատնուեցաւ Հուրիէի խումբէն:

-Սուրիոյ լողի հաւաքականի մարզուհի Էնանա Սուլէյման Չինաստանի մէջ տեղի ունեցած լողի համաշխարհային մրցաշարքի աւարտին 800 եւ  400 մեթր ազատ լողի մրցումներուն նոր թուանիշ մը արձանագրելով գրաւեց աղիւսակին 4-րդ հորիզոնականը:

Սպանիոյ առաջնութեան 10-րդ փուլի մրցումներուն, ախոյեան Ռէալ Մատրիտ 2 – 1 արդիւնքով պարտութեան մատնեց Սէլթա Վիկոն: Իտալացի Գարլո Անչելոթիի գլխաւորած խումբի կոլերու հեղինակները դարձան ֆրանսացի Քիլիան Մպափէն ու պրազիլցի Վինիսիոս Ժունիըրը, որոնց երկուքին փոխանցումները կատարեց խումբի երիցագոյն խաղացող Լուքա Մոտրիչ: Նոյն փուլին, քաթալոնէական Պարսելոնան  շարունակելով իր յաջող արդիւնքները 5 – 1 արդիւնքով պարտութեան մատնեց Սեվիլիան: 22-րդ վայրկեանին, Պարսելոնայի կոլերու բացումը տուգանային հարուածով կատարեց Ռոպերթ Լեւանտովսքին, որմէ հինգ վայրկեան ետք Փետրին կրկնապատկեց արդիւնքը: 38-րդ վայրկեանին Լեւանտովսքին կրցաւ նշանակել խումբին երրորդ կոլը: Երկրորդ կիսախաղը շարունակուեցաւ նոյն կերպով, ուր Պարսելոնայի մարզիկները իշխեցին խաղարկութեան: 81-րդ վայրկեանին Փապլո Թորրէն նշանակեց 4-րդ կոլը, որմէ մէկ վայրկեան ետք մէկ տարուան բացակայութենէ ետք դաշտ մուտք գործեց Կաւին, որ ծունկի վնասուածքով հեռու մնացած էր դաշտերէն: Նախքան հանդիպումին աւարտը, Սեվիլիան արձանագրեց իր միակ կոլը, որմէ մէկ վայրկեան ետք Փապլո Թորէն եզրափակեց կոլերու շարքը:

Ինթեր Միամիի արժանթինցի յարձակող Լիոնէլ Մեսսի Հեթրիքի հեղինակ դարձաւ MLS-ի գլխաւոր  առաջնութեան վերջին փուլի խաղին։ Հանդիպումը աւարտեցաւ Միամիի ջախջախիչ յաղթանակով՝ 6-2 արդիւնքով: Այսպիսով Մեսսի դարձաւ ամերիկեան ակումբի պատմութեան լաւագոյն յարձակողական խաղացող: 37-ամեայ մարզիկը  ամերիկեան ակումբի կազմին հետ  դարձած է 33 կոլի հեղինակ։ Այս ցուցանիշով արժանթինցին շրջանցած է էքուատորցի յարձակող Լէոնարտո Քամփանան, որ Ինթերի կազմին հետ ունի  32 կոլ։ Աւելցնենք, որ MLS-ի ընթացիկ մրցաշրջանին Մեսսի մասնակցած է 19 հանդիպումի եւ նշանակած՝ 20 կոլ: