Ռէալ Մատրիտի Եւ Պրազիլի հաւաքականի նախկին կիսապաշտպան Մարսէլո յայտարարեց, որ վերջ պիտի տայ ֆութպոլի իր արհեստավարժ կեանքին: Մարսէլո այս հարցով X համացանցային էջով յատուկ տեսանիւթի մը ընդմէջէն այս յայտարարութիւնը կատարեց: Մարսէլո 36 տարեկան է։ Ան իր մարզական կեանքը սկսած է  Ֆլումինենս ֆութպոլի ակումբին մէջ: Ռէալին  միացած է 2007-ին, որուն կազմին հետ նուաճած է 25 տիտղոս։ Մարսէլո հինգ անգամ Չեմփիընզ լիկի ախոյեան դարձած է, 6 անգամ՝ Սպանիոյ առաջնութիւնը ձեռք բերած, երկու անգամ՝ Սպանիոյ գաւաթը։ 2022-ի ամռան ան տեղափոխուած է յունական Օլիմպիակոս, սակայն 2023-ի Փետրուարին խզած է պայմանագրութիւնը։ 2023-ի Փետրուարէն մինչեւ 2024-ի Նոյեմբեր Մարսէլո հանդէս կու գար  Ֆլումինենսի կազմին հետ: Շաբաթ երեկոյեան նախքան Ռէալ Մատրիտ եւ Աթլեթիքոյի հանդիպումը, արքայական ակումբը բազմաթիւ համակիրներու առջեւ ներկայացուց պատմութեան մէջ իր լաւագոյն խաղացողներէն մէկը եւ անոր նուիրեց իր տարազը՝ զետեղուած ապակեայ ցուցատախտակի մէջ:

Սպանիոյ հաւաքականի, Սեւիլիայի, Ռէալ Մատրիտի  եւ փարիզեան Փարիզ սան Ժերմանի  նախկին խաղացող, 38-ամեայ պաշտպան Սերժիո Ռամոս տեղափոխուեցաւ մեքսիքական Մոնտերէյ։ Այս լուրը հաղորդեց ակումբի կայքը։ Կողմերը կնքեցին մէկ տարուան պայմանագրութիւն: 2024-ի ամռան, Սեւիլիայէն  հեռանալէ ետք, Սերժիո Ռամոս ազատ գործակալի կարգավիճակի մէջ էր։  Սերժիո Ռամոս Սպանիոյ հաւաքականին հետ դարձած է աշխարհի ախոյեան եւ Եւրոպայի կրկնակի ախոյեան։ Ռէալին հետ ան նուաճած է 22 տիտղոս:

Անցեալ շաբթուան ընթացքին FourFourTwo յայտարարեց ֆութպոլի պատմութեան  լաւագոյն ֆութպոլիստներու վարկանիշը։ Այս ցուցակի առաջին հորիզոնականը գրաւեց  Պարսելոնայի նախկին յարձակող Լիոնէլ Մեսսին: Երկրորդ տեղը զբաղեցուց Պրազիլի հաւաքականի նախկին ֆութպոլիստ Փելէն։ Լաւագոյն եռեակը եզրափակեց  Արժանթինի հաւաքականի նախկին ֆութպոլիստ Տիեկո Մարատոնան։

Ըստ FourFourTwo-ի, Ֆութպոլի պատմութեան լաւագոյն 10 ֆութպոլիստները հետեւեալներն են.

Լիոնէլ Մեսսի, Արժանթին

Փելէ, Պրազիլ

Տիէկո Մարատոնա,  Արժանթին

Քրիստիանո Ռոնալտո, Փորթուկալ

Եոհան Կրոյֆ, Հոլանտա

Ռոնալտո,Պրազիլ

Ֆրանց Փեկենփաուըր, Գերմանիա

Ալֆրետո տի Ստեֆանո, Սպանիա

Մարքո վան Փաստըն, Հոլանտա

Զենատտին Զետան, Ֆրանսա։