Նայիրի Քէօշկէրեան-Բանոյեան- Դժբախտաբար դպրոցը այս տարի հոգեբանական խորհրդատու չունի, կը փափաքէինք ունենալ, բայց ըստ երեւոյթի այս ճիւղը ուսանողները քիչ են եւ դիմում ներկայացնող չկայ: Ուսուցչուհիները իրենց մանկավարժական փորձառութեան համաձայն կարելին կ’ընեն նշեալ բացը գոցելու համար: Դպրոցի բժշկուհին շաբաթական հերթականութեամբ նիւթեր եւ տեսերիզներ կը ներկայացնէ՝ մեղմացնելու փոքրերուն մէջ ընդհանրացած կարգ մը վատ սովորութիւններ եւ լուսաբանելու առօրեային առնչուող կարգ մը հարցեր։

Ն. Ք. Բ. – Մարդուժի առումով վերջերս նկատելի է մասնագէտ եւ տաղանդաւոր ուսուցչուհիներու ապահովման դժուարութիւնը, իսկ դպրոցը որպէս կառոյց եւ դասարաններ շատ պատշաճ եւ արդիական կը համարուի:

Ն. Ք. Բ. – Տնտեսական ծանր պայմաններուն համապատասխան չէ ուսուցիչներուն վարձատրութիւնը եւ այս մէկը մեր հիմնական հարցն է։ Այդուհանդերձ Ազգային Իշխանութիւնն ու Հոգաբարձութիւնը կը փորձեն կարելի եղածին չափ բարերարներու ճամբով ուսուցչական կազմին նիւթական յաւելեալ պարգեւներ ապահովել: Յոյսով ենք, որ երկրի տնտեսական ծանր վիճակը աստիճանաբար կը մեղմանայ եւ լուծումի կը հասնինք այս առումով:

Ն. Ք. Բ. – Դպրոցը ունի իր կարգն ու կանոնը եւ ուսումնական տարեշրջանի սկիզբը կայացած ծնողական ժողովին տնօրէնութեան լուսաբանութիւններով ծնողները բաւարար չափով դպրոցի կանոններուն իրազեկ կը դառնան: Մենք յարգանքով կ’ընդունինք ծնողներուն առաջարկներն ու գանգատները եւ կ’աշխատինք դպրոց-ծնողք յարաբերութիւնը աշխոյժ եւ արդիւնաւէտ պահել:

Ն. Ք. Բ. – Շաբաթը հինգ դասապահ հայերէնով եւ երկու դասապահ կրօնով ճշդուած ծրագիրը ամբողջովին կ’իրագործուի եւ փոքրիկը կը ստանայ քրիստոնէական եւ հայեցի դաստիարակութիւն, ինչպէս նաեւ կը նշէ իւրաքանչիւր կրօնական եւ ազգային տօն, իսկ այս բոլորին կողքին կը մասնակցի գաղութին մէջ տարբեր միութիւններու կազմակերպած մրցոյթներուն եւ ձեռնարկներուն: Վարժարանը ունի նաեւ գրադարան, ուր հերթաբար այցելելով աշակերտները կը մտնեն գիրքերու աշխարհ, ընթերցանութեան սովորութիւնը կը զարգացնեն եւ այլն: Փոքրերը լեզուական մեծ հարցեր չունին, սակայն խառն ամուսնութիւններու հետեւանքով կարգ մը աշակերտներ անպայման դժուարութիւններ կ’ունենան:

Մեր վերջին երկու հարցումները ուղղեցինք մանկապարտիզպանուհի Սոնա Գրտանեան -Պզտիկեանին:

Ս.  Գ.  Պ. – Ներկայ պայմաններուն բերումով, վկայեալ/մասնագէտ երիտասարդները կը նախընտրեն աշխատիլ սեփական հատուածի այնպիսի հաստատութիւններու մէջ, ուր աշխատավարձերը աւելի բարձր են։ Բարեբախտաբար, սակայն, մանկապարտէզի մեր ուսուցչական կազմը բաւական լաւ ձեւով կը կատարէ իրեն վստահուած գործը եւ իր փորձառութեան եւ մասնագիտական տուեալներուն շնորհիւ լաւագոյն հոգատարութիւնը եւ դաստիարակութիւնը կը ջամբէ մեր փոքրիկներուն։ Եթէ նորեր պիտի ընդունինք, առաջնահերթութիւնը համալսարանական վկայական ունեցող թեկնածուներուն կը տրուի բնականաբար։

Ս.  Գ.  Պ. – Շատ կը փափաքէի, որ մանկապարտէզէն ներս ունենայինք խաղավայր մը, ինչպէս նաեւ արուեստի (պար, երաժշտութիւն եւ այլն) ուսուցիչներ, որովհետեւ այս տարիքը յարմարագոյն փուլն է իւրաքանչիւրին ձիրքը յայտնաբերելու եւ ուղղելու։ Այս բոլորին փոխարէն, սակայն, մենք մեր կարողութիւններուն համաձայն կը փորձենք այս բացթողումը ամբողջացնել խաղերու յատկացուած եւ չափական (rhythmic) մարզանքի դասապահերով։

Կը նախընտրէի որ դպրոցի ժամերը ըլլային աւելի երկար, մթնոլորտի մէջ պահելու մեր փոքրիկները եւ աւելի ազատ ձեւով իրագործելու մեր ծանր ծրագիրը, որ կ’ընդգրկէ երեք լեզու՝ հայերէն, արաբերէն եւ անգլերէն։

Մանկապարտէզին կը պակսի նաեւ հոգեբանական խորհրդատու մը, որ հիմնական գործօններէն մէկն է առողջ սերունդ պատրաստելու մանկապարտէզէն ներս, որովհետեւ այս տարիքի փոքրիկներուն ներաշխարհ թափանցելը յատուկ հմտութիւն կը պահանջէ։