Եկեղեցական արարողութիւններ, գունաւոր հաւկիթներ, զատկուան կարկանդակ, ձուկ, գինի, կանաչեղէն, իսկ սեղանին շուրջ ընտանիքի անդամներուն միջեւ հաւկթախաղ։ Հայերը, Հայաստանի եւ Սփիւռքի մէջ, այսպէս կը տօնեն Զատիկը, կամ՝ Քրիստոսի հրաշափառ Յարութեան տօնը:

Այլ երկիրներ եւ ազգեր Զատիկը տարբեր աւանդութիւններով կը տօնեն։ Փորձենք ներկայացնել քանի մը երկրի աւանդութիւն.

-Ֆինլանտիոյ մէջ մանուկները Զատիկին իրենց երեսը կը ներկեն,  գլխուն եւ վզին կը փաթթեն շարֆ (բրդեայ վզկապ) եւ փողոց կ’ելլեն՝ մուրացկանութեան: Արեւմտեան Ֆինլանտիոյ որոշ հատուածներու մէջ մարդիկ խարոյկ կը վառեն: Աւանդութեան համաձայն, ծուխը իր հետ կը տանի երկրին վրայ շրջող չար հոգիները:

-Լեհաստանի մէջ Զատկուան օրը կը նմանի հայկական Վարդավառին: Մարդիկ իրար վրայ ջուր կը թափեն: Այս աւանդութիւնը կը կոչուի  Սմինկուս-Տինկուս: Ըստ առասպելի՝ այն աղջիկները, որոնց վրայ ջուր կը թափուի, տարուան ընթացքին կ’ամուսնանան:

Եթէ Զատկուան օրը ֆրանսական Օ (Haux) քաղաք այցելէք, չմոռնաք ձեզի հետ տանիլ պատառաքաղ, քանի որ այնտեղ աւանդութիւն դարձած է տօնին օրը գլխաւոր հրապարակին մէջ շատ մեծ օմլէթ մատուցել: Օմլէթը կը պատրաստուի 4.500 հաւկիթով եւ կրնայ կշտացնել 1000 հոգի: Կ’ըսուի, թէ այս աւանդութիւնը ձեւաւորուած է այն ատեն, երբ Նափոլիոն իր զօրքին հետ հասնելով Ֆրանսա՝ կանգնած է փոքրիկ քաղաքի մը մէջ, ուր անոր օմլէթ հիւրասիրած են:  Նափոլիոն այնքան սիրած է այս ուտեստը, որ քաղաքի բոլոր մարդոց հրամայած է  հաւաքել իրենց տունը մնացած հաւկիթները ու բոլորով օմլէթ պատրաստել:

-Յունաստանի որոշ հատուածներու մէջ Զատկուան օրը պատուհանէն դուրս կը նետեն հին սպասքը՝ պնակներ, կուժեր եւ այլն: Այս աւանդութիւնը մասամբ կը նմանի Վենետիկի Ամանորեայ աւանդութեան, երբ պատուհանէն դուրս կը նետեն հին իրերը:

-Նորվեկիոյ մէջ Զատկուան օրը ընդունուած է ընթերցել ոճրային պատմուածքներ: Հեղինակներ յատկապէս կը հրատարակեն նման գիրքեր, որոնք կ’անուանուին «Զատիկի օրուան քաշողական գիրքեր»: Այս աւանդութիւնը կը սերի 1923-էն։

-Չեխիոյ մէջ Զատիկին օրը տղամարդիկ ուռենիի ճիւղերը կը զարդարեն ժապաւէններով եւ անոնցմով թեթեւակի  կը հարուածեն կանանց: Աւանդութեան համաձայն, ուռենին գարնան առաջին ծառն է եւ անոր թեթեւ հարուածը կենսունակութիւն եւ պտղաբերութիւն կը փոխանցէ կիներուն:

-Սպանական Վերժես քաղաքին մէջ Աւագ Հինգշաբթի օրը կը կազմակերպեն «մահացու պար» կոչուող բեմադրութիւնը: Մարդիկ կը հագնին կմախք յիշեցնող հագուստներ եւ կը սկսին պարել: Պարը կը սկսի կէս գիշերին եւ երեք ժամ կը տեւէ:

-Ամերիկայի մայրաքաղաք Ուաշինկթընի մէջ տարիներ շարունակ Զատիկը կը յիշատակուի յատուկ արարողակարգով: Խաշած գունաւոր հաւկիթները կը դրուին խոտի վրայ եւ մարդիկ պէտք է փորձեն գլորել զանոնք մեծ դգալներով: Այս արարողութիւնը կ’ընթանայ երաժշտութեան ընկերակցութեամբ: Կը կազմակերպուին նաեւ մարզական այլ ձեռնարկներ՝ մանուկներուն առողջ ապրելակերպ քարոզելու նպատակով:

-Երուսաղէմի մէջ մարդիկ Աւագ Ուրբաթ օրը կը քալեն այն ճանապարհով, որով Յիսուս անցած է իր խաչելութեան օրը:

Որոշ մարդիկ իրենց ուսերուն Խաչ կը կրեն՝ ի յիշատակ Յիսուս Քրիստոսի:

-Իտալիոյ մայրաքաղաքին մէջ Աւագ Ուրբաթ օրը Հռոմի Պապը Խաչի օրհնութեան արարողութիւնը կը կատարէ: Հսկայ խաչերու ծայրերը կը լուսավառեն ջահերով եւ այդպիսով կը լուսաւորեն երկինքը: Իսկ Կիրակի օրը հազարաւոր մարդիկ կը հաւաքուին Սուրբ Պետրոսի հրապարակ, ուր Հռոմի Պապը եկեղեցւոյ պատշգամբէն կ’օրհնէ հաւաքուած ժողովուրդը: