Անգլիոյ ախոյեանութեան 11-րդ փուլի մրցումներուն, Մանչեսթըր Սիթին յաջողեցաւ 3 – 0 արդիւնքով պարտութեան մատնել Լիվըրփուլը եւ գրաւել աղիւսակի երկրորդ դիրքը:

Մրցումի սկիզբէն, Սիթին տիրապետեց խաղարկութեան եւ կրցաւ վտանգի ենթարկել մրցակիցին դարպասը: 9-րդ վայրկեանին, հանդիպումի իրաւարարը «VAR»-ին հետեւելէն ետք տուգանային հարուած մը հաստատեց, ուստի Էրիք Հալանտ ձախողելով չկրցաւ նշանակել խումբին առաջին կոլը: Սիթիի խաղցողները չյուսահատելով, շարունակեցին իրենց խիտ յարձակումները եւ վտանգի ենթարկեցին Լիվըրփուլի դարպասը: 29-րդ վայրկեանին Հալանտ գնդակի քանի մը յաջող փոխանցումներէ ետք կրցաւ ցնցել Լիվըրփուլի դարպասը: Նախքան կիսախաղ հասնիլը, Կոնզալէս հեռաւոր հարուածով մը կրկնապատկեց արդիւնքը: Երկրորդ կիսախաղի խաղարկութեան ոճը մնաց նոյնը. Սիթին յարձակեցաւ, իսկ Լիվըրփուլ պաշտպանուեցաւ: 63-րդ վայրկեանին Ճիրիմի Տիքու կրցաւ նշանակել խումբին երրորդ եւ վերջին կոլը: Նշենք, որ այս եղաւ Կուարտիոլայի մարզական կեանքի 1000-րդ մրցումը, զոր կը ղեկավարէ որպէս մարզիչ:

Մարոքի հաւաքականի եւ Ֆրանսայի Փարիզ Սան Ժերմանի խաղցող Աշրաֆ Հաքիմի Չեմփիընզ Լիկի Պայերն Միւնէխի դէմ տեղի ունեցած հանդիպումին ծանրօրէն վիրաւորուեցաւ եւ հեռացաւ դաշտէն, որուն հետեւանքով ան պիտի բացակայի շուրջ 8 շաբաթ: Այս պատճառով ան պիտի բացակայի նաեւ Մարոքի հաւաքականի մրցումներէն, որուն իր մասնակցութիւնը պիտի բերէր Ափրիկէի ախոյեանութեան մրցաշարքի ծիրէն ներս: Ըստ սպանական AS թերթին, ֆրանսական ակումբէն միայն Հաքիմին պիտի չբացակայի, այլ նաեւ խումբը՝ ազդուած ըլլալով Տիզիրի Տուիի եւ Օսման Տեմպելէի բացակայութիւններէն:

Հոլանտայի Աժաքս Ամսթրտամ ակումբի պատասխանատուները իրենց վերջին նիստին որոշեցին հեռացնել խումբի մարզիչ Ժոն Հեթիկան ու օգնական մարզիչ Մարսէլ Քայզէրը իրենց պաշտօններէն: Ըստ ակումբի կայքէջին, վարչակազմը դժգոհ է խումբին վերջին շրջանի արձանագրած արդիւնքներէն: Մինչ նոր մարզիչի նշանակումը, սոյն պաշտօնը վստահուած է ֆրէտ Կրիմին: Աժաքսի մարզական տնօրէն՝ Ալեքս Քրոս ըսաւ. «Դժուար որոշում էր Ժոնը հեռացնելը. Ակումբը եկար ժամանակը առիթ տուած էր անոր խումբի խաղարկութիւնն ու արդիւնքները բարելաւելու, բայց ան չկրցաւ իրականացնել իրեն վստահուած աշխատանքը»: Նշենք որ Ժոնին պայմանագիրը նկատի առնուած էր մինչեւ Յուլիս 2027: