Սիրելի հայ ժողովուրդ,
2020 թուականի 27 Սեպտեմբերից Արցախի Հանրապետութեան հանդէպ Ատրպէյճանի կողմից ձեռնարկուած հերթական լայնամասշտաբ պատերազմը, որ ծաւալուել է Թուրքիայի եւ ահաբեկչական խմբաւորումների հետ կապուած այլ պետութիւնների եւ շրջանակների բացայայտ ու ակտիւ մասնակցութեամբ` վերջին մի քանի օրերին ձեռք է բերել դրամատիկ զարգացումների ընթացք: Արցախի եւ Ատրպէյճանի միջեւ սահմանի ողջ երկայնքով, 45 օր շարունակ ընթանում են ծանր մարտեր:
Ցաւօք, Արցախի Հանրապետութեան եւ Հայաստանի Հանրապետութեան գործող քաղաքական իշխանութիւնները, որ հիմնական պատասխանատուն եւ երաշխաւորն են մեր ժողովրդի անվտանգութեան եւ պաշտպանուածութեան, ճգնաժամային իրավիճակում ունակ չեղան համախմբելու համազգային ներուժը եւ չկարողացան լիարժէք օգտագործել քաղաքական ու դիւանագիտական այն հնարաւորութիւնները, որոնք կարող էին նուազեցնել, կամ կանխել վերահաս աղէտը:
Երէկ գիշերը մամուլում հրապարակուած եռակողմ յայտարարութեան դրոյթները լրջօրէն վտանգում են Արցախի Հանրապետութեան պետական անկախութեան եւ տարածքային ամբողջականութեան սկզբունքները:
Ելնելով ներկայիս օրհասական վիճակի թելադրանքից` առաջարկում եւ պահանջում ենք.
-Հայաստանի Հանրապետութեան քաղաքական իշխանութիւնից, մեր ժողովրդի համար ճակատագրական այս օրերին, սեփական իշխանութիւնը պահելու նպատակով եւ սխալները ուրիշի վրայ բարդելու փոխարէն, անյապաղ դադարեցնել ժողովրդի միասնականութիւնը խաթարող ցանկացած գործողութիւն, զերծ մնալ երկրում ներքին թշնամու փնտրտուքներից:
-Արցախի Հանրապետութեան նախագահի հրաժարականը, որին պէտք է հետեւի ճգնաժամային կառավարման արդիւնաւէտ եւ համարժէք մարմինների ստեղծումը. դրանք պէտք է ունենան համապատասխան իրաւասութիւններ համախմբելու համազգային ներուժը եւ ընդունելու ստեղծուած իրավիճակից արժանապատուօրէն դուրս գալու որոշումներ:
-Մեր աջակցութիւն ենք յայտնում ՀՀ վարչապետի հրաժարականի պահանջով հանդէս եկած Հայաստանի Հանրապետութեան 17 քաղաքական ուժերին` համարելով, որ այդ գործընթացը կարող է նոր հնարաւորութիւնների սկիզբ դառնալ:
Սիրելի քոյրեր եւ եղբայրներ
Խոնարհուելով այս օրերին հայրենիքի պաշտպանութեան համար հերոսաբար զոհուածների յիշատակի առջեւ եւ կիսելով նրանց հարազատների խորը վիշտը, շուտափոյթ ապաքինում մաղթելով բոլոր վիրաւորներին, բարձր գնահատելով պատերազմական իրավիճակում Հայոց բանակի, կամաւորականների եւ աշխարհազօրայինների անձնուրաց նուիրումը հայրենիքի պաշտպանութեան գործին` կոչ ենք անում հայկական երկու հանրապետութիւնների բոլոր քաղաքացիներին եւ աշխարհասփիւռ հայութեանը չյուսահատուել եւ հայրենիքի պաշտպանութեան գործը դարձնել օրուայ գլխաւոր հրամայականը:
Արցախի հանրապետութեան Ազգային Ժողովի`
«Արցախի Ժողովրդավարական Կուսակցութուն» խմբակցութիւն
«Հայ Յեղափոխական Դաշնակցութիւն» խմբակցութիւն
«Արցախի Արդարութիւն Կուսակցութիւն» խմբակցութիւն
«Միասնական Հայրենիք» խմբակցութիւն
