Կեանքի մէջ սկզբունքները շատ կարեւոր են իւրաքանչիւրիս համար, որովհետեւ իւրաքանչիւր մարդ կը գործէ իր հաւատքին եւ համոզումներուն համաձայն: Եթէ խիղճը մաքուր ըլլայ, միտքն ու հոգին ներդաշնակութեան մէջ կը մնան:
Գոյութիւն ունին կարգ մը սկըզբունքներ, որոնք հանգիստ ու խաղաղ կը պահեն հոգին: Թուենք քանի մը սկզբունքային թելադրանքներ.
1-Առաւօտեան կանուխ, արեւածագին հետ արթնցէ՛ք, մաքուր օդ շնչեցէ՛ք եւ աղօթեցէ՛ք: Ապա փորձեցէ՛ք կարդալ գիրք մը, կամ թերթ մը թերթատեցէ՛ք:
2-Միշտ համբերատար եղէ՛ք: Զայրոյթը, նախանձը եւ բամբասանքը կը քայքայեն մարդուն հոգին:
3- Ազատ կամքի տէր եղէ՛ք, ապրեցէ՛ք ազատօրէն եւ թոյլ մի՛ տաք, որ որեւէ մէկը ձեզ կառավարէ: Դո՛ւք գիտէք, թէ ինչ կ’ուզէք այս կեանքէն, եւ ինչպէ՛ս կը փափաքիք իրականացնել զայն:
4-Հիւրերու նկատմամբ յարգալիր եղէ՛ք:
5- Մի՛ սեփականացնէք այն, ինչ որ ձեզի չի՛ պատկանիր, կամ ձեր աշխատանքին արդիւնքը չէ: Ձեր նուաճումներով եւ ձեռքբերումներով միայն հպարտացէ՛ք:
6-Յարգանք տածեցէ՛ք մարդոց եւ ձեր միջավայրին նկատմամբ: Տկար անձնաւորութիւնները ծաղրի մի՛ ենթարկէք:
7- Յարգեցէ՛ք այլոց կարծիքն ու սկզբունքները: Երբեք մի՛ ընդհատէք ձեր զրուցակիցը, նենգութեամբ մի՛ վարուիք ձեր յարաբերութիւններուն մէջ, որովհետեւ ուշ կամ կանուխ պիտի պարզուին ձեր նենգ ծրագիրները: Յարգեցէ՛ք բոլոր մարդոց խօսքի ազատութեան սկզբունքը:
8-Մարդոց հետ խօսակցութեան ընթացքին բացասական արտայայտութիւններով մի՛ թունաւորէք ձեր զրուցակիցը, նոյնիսկ եթէ համաձայն չէք անոր արտայայտած մտքերուն հետ: Բացասական վերաբերմունքը վատ տպաւորութիւն կը թողու, եւ դժուար թէ այդ տպաւորութիւնը փարատի կարճ ժամանակի ընթացքին:
9-Ամէն մարդ սխալ կը գործէ: Մի՛ մեղադրէք մարդիկը իրենց սխալներուն համար, միշտ յիշեցէ՛ք, որ դուք եւս սխալներ կը գործէք եւ անթերի մարդ գոյութիւն չունի:
10- Եթէ բացասական միտքերէ կը տառապի ձեր հոգին եւ միտքը, աշխատեցէ՛ք աշխարհին լաւատեսութեամբ նայիլ, երաժշտութիւն ունկնդրել, արուեստի կեդրոններ յաճախել, գիրք ընթերցել եւ զուարճանալ: Մի՛ հետապնդէք մարդիկը, զբաղեցէ՛ք ձեր գործերով, ձեր ծրագիրներով, որովհետեւ այլոց կեանքը դուք տնօրինելու իրաւունք չունիք: Միշտ յիշեցէք՝ անգործ եւ դատարկ ներաշխարհ ունեցող մարդիկ կը զբաղին այլոց հետապնդելով եւ վատաբանելով: Ձեր հոգին ազնիւ պահեցէ՛ք եւ վեր բարձրացէ՛ք մարդկային ախտերէ:
11-Երեխաները մեր ապագան են: Զանոնք պէտք է դաստիարակենք սիրով, իմաստութեամբ, սորվեցնենք ըլլալ հանդուրժող, մտածող եւ աշխատող: Թող ձեր երեխաները անկաշկանդ մեծնան, մի՛ կաշկանդէք զիրենք ձեր շրջապատի յետամնաց կաղապարներով:
12-Մարդոց վնաս մի՛ հասցնէք: Նոյնիսկ եթէ անոնք անյարիր վերաբերմունք ցուցաբերեն: Եղէ՛ք ինքնավստահ ու մեծահոգի, միայն այդ պարագային դուք պիտի արժանանաք մարդոց յարգանքին ու սիրոյն: Յիշեցէք չար եւ ոխակալ մարդոց գործերը բացասական անդրադարձ կ’ունենան իրենց իսկ կեանքին վրայ:
14-Ձգտում ունեցէ՛ք հասնելու հոգեկան ներդաշնակութեան: Ձեր հոգին գեղեցիկ թող ըլլայ այնքան, որքան ձեր մարմինը: Հոգեկան ձեր սնունդը ապահովեցէք ինքնազարգացումով:
Եւ վերջապէս բարեգործ եղէք, որովհետեւ բարեգործ ու ինքնաբաւ ըլլալով դուք կը գտնէք ձեր երջանկութեան բանալին:
Սոնա Տէր Պօղոսեան-Տարաքճեան