Ընդդիմադիր 17 քաղաքական ուժերուն ձեւաւորած` «Հայրենիքի փրկութեան շարժման» վարչապետի թեկնածուն Հայաստանի առաջին վարչապետ, պաշտպանութեան նախկին նախարար ու Հանրային խորհուրդի նախկին նախագահ Վազգէն Մանուկեանն է. յայտարարեց ՀՅԴ Հայաստանի Գերագոյն Մարմնի ներկայացուցիչ Իշխան Սաղաթէլեան շարժման Խորհուրդի նիստէն վերջ:
«Հայրենիքի փրկութեան շարժումը» ձեւաւորած է իր Խորհուրդը: Խորհուրդի նախագահն է Վազգէն Մանուկեան, համակարգողն է ՀՅԴ Հայաստանի ԳՄ ներակայացուցիչ Իշխան Սաղաթէլեան:
Խորհուրդի անդամներն են Արցախը յանձնելու յայտարարութեան դէմ արտայայտուած 17 քաղաքական ուժերու ներկայացուցիչները, ինչպէս նաեւ 15 մտաւորականներ, հասարակական գործիչներ եւս, որոնք կը վայելեն հանրութեան վստահութիւնը:
Քննարկած են նաեւ ճանապարհային քարտէզն ու անցումային կամ հակաճգնաժամային ծրագիրները:
Վազգէն Միքայէլի Մանուկեանը 74 տարեկան է:
Ան Հայաստանի երրորդ հանրապետութեան առաջին վարչապետն է, ՀՀ պաշտպանութեան նախկին նախարարը Արցախեան պատերազմի ընթացքին` 1992-1993 թուականներուն:
1988 թուականի Փետրուարէն «Ղարաբաղ» կոմիտէի համահիմնադիրն է եւ կոմիտէի անդամ, 1988 թուականի Յունիսէն` «Ղարաբաղ» կոմիտէի համակարգողը: 10 Դեկտեմբեր 1988-ին «Ղարաբաղ» կոմիտէի միւս անդամներուն հետ ձերբակալուած է, 6 ամիս անցուցած է Մոսկուայի «Մատրոսքայա տիշինա» բանտին մէջ: Եղած է «Հայոց Համազգային Շարժում» կուսակցութեան համահիմնադիր եւ վարչութեան առաջին նախագահ: 1990-1995 թուականներուն եղած է Հայաստանի Գերագոյն խորհուրդի պատգամաւոր, 1995-2007 թուականներուն` ՀՀ Ազգային ժողովի պատգամաւոր: 1990-1991 թուականներուն` ՀՀ վարչապետ: 26 Սեպտեմբեր 1991-ին Վազգէն Մանուկեանը հրաժարական տուած է վարչապետի պաշտօնէն: 1991 թուականի շարժման գործուն մասնակիցներու եւ համախոհներու հետ նախաձեռնած է Ազգային Ժողովրդավարական Միութիւն (ԱԺՄ) կուսակցութեան հիմնադրումը: 1991 թուականէն սկսեալ ԱԺՄ կուսակցութեան վարչութեան նախագահ: 1992 թուականի Սեպտեմբերին նշանակուած է ՀՀ պետնախարար, այսուհետեւ պաշտպանութեան նախարար` միաժամանակ ղեկավարելով ՀՀ ռազմարդիւնաբերական համալիրը: Վազգէն Մանուկեանի օրօք ձեւաւորուած է կանոնաւոր հայկական բանակը, փոխուած է պատերազմի ընթացքը, եւ երբ հայկական կողմը անընդմէջ յաղթանակ կը տանէր, 1993 թուականի Օգոստոսին դադրած է պաշտօնէն: 2009 թուականի Մարտէն մինչեւ 2019 թուականի Դեկտեմբեր ՀՀ Հանրային խորհրդի նախագահն էր: 2019 թուականէն` «Վերնատուն» հասարակական քաղաքական ակումբի նախագահ:
