18 Յուլիս 2021-ին «Հայաստան» դաշինքի առաջնորդ Ռոպերթ Քոչարեան յայտարարութիւն հրապարակեց Ազգային Ժողով չուղղուելուն առնչութեամբ.
«Սիրելի՛ հայրենակիցներ,
«Հայաստան» դաշինքի պաշտօնական ներկայացուցիչ Արամ Վարդեւանեան Կեդրոնական Ընտրութեան Յանձնախումբին ներկայացուց պատգամաւորի մանդատէն հրաժարելու` իմ որոշումիս դիմումը:
Ժամանակին եղած եմ թէ՛ Արցախի, թէ՛ Հայաստանի խորհրդարաններու պատգամաւոր, սակայն բնաւորութեան կերտուածքով միշտ հանդիսացած եմ գործադիր իշխանութեան մարդ: Համոզուած եմ, որ հիմա աւելի ճիշդ է տեղս զիջիմ խումբի անդամներուս, որոնցմէ իւրաքանչիւրը, վստահ եմ, լաւ պատգամաւոր պիտի դառնայ:
Այս քայլով նաեւ իմ համաձայնութիւնս յայտնած եմ հազարաւոր խումբի անդամներուն, որոնք ինծի փոխանցած են այդ կարծիքը, որ Արցախի Հանրապետութեան ու Հայաստանի Հանրապետութեան Նախագահի պաշտօններէն վերջ պէտք չէ գայթակղիմ պատգամաւորի մանդատով: Վերջապէս, ինծի ձայն տուած էին որպէս Դաշինքի վարչապետի թեկնածու:
Միեւնոյն ատեն, յարկ կը համարեմ շեշտել, որ Ազգային ժողով չերթալս չի նշանակեր պայքարէն հրաժարիլ: Ֆրաքցիան Դաշինքի ներկայութիւնն է Ազգային ժողովի մէջ, իսկ ես կը շարունակեմ մնալ Դաշինքի առաջնորդը ու ամէնօրեայ հետեւողական աշխատանքով պիտի նպաստեմ մեր սպասուած յաղթանակներուն:
Վստահ եմ` ամէն ինչ լաւ պիտի ըլլայ:
ՀՀ երկրորդ նախագահ, «Հայաստան» դաշինքի առաջնորդ Ռոպերթ Քոչարեան»