Հայաստանի Հանրապետութեան Ազգային ժողովին մէջ իր ելոյթին ընթացքին Ազգային ժողովի փոխնախագահ Իշխան Սաղաթէլեան ելոյթ ունենալով ըսաւ, որ այն իշխանութիւնը, որ շրջափակած է Հայաստանի Հանրապետութեան Սահմանադրական դատարանը, այն Ազգային ժողովը, որուն պատգամաւորները իրենց կուսակցութեան ղեկավարին հրահանգով կազմակերպած են դատարաններու շրջափակումը, այդ իշխանութիւնը եւ այդ քաղաքական մեծամասնութիւնը իրաւունք չունին խօսելու արդարադատութեան համակարգին եւ արդարադատութեան համակարգին մէջ բարեփոխումներ իրականացնելու մասին:
«Յայտարարեցիք զտում, ըսիք՝ արդարադատութեան համակարգէն պիտի հեռացնէք չարաշահող դատաւորները, բայց պարզուեցաւ, որ կը վերադարձնէք չարաշահող, փտած դատաւորները, նոյնիսկ անոնց, որոնք ձեր ըսած՝ չարաշահող նախկին իշխանութիւնը հեռացուցած էր դատական համակարգէն: Կը խօսիք «օրէնքի բռնատիրութեան» մասին. սիրելի՛ հայրենակիցներ, ատիկա խաբէութիւն է: Եթէ խօսքը օրէնքի եւ իրաւունքի գերակայութեան մասին է եւ օրէնքի իրաւահաւասարութեան մասին է, ատիկա շատ լաւ է, բայց դուք անոր հետ որեւէ կապ եւ առնչութիւն չունիք, ձեր բոլոր բարեփոխումներուն մեկնարկը կը սկսի մէկ կէտէ՝ ամրապնդել ձեր իշխանութիւնը»: