Երեսուն տարի առաջ` 1991թ․ Սեպտեմբերի 21-ին, ՀՀ քաղաքացիներն Անկախութեանն ասացին` այո: Մենք ընտրեցինք ազգի կազմակերպուածութեան բարձրագոյն ձեւը` անկախ պետականութիւնը, համոզուած լինելով, որ ինքնութեան, արժանապատուութեան, խաղաղութեան եւ արարումի մեր ճանապարհն անցնելու ենք ազգային միասնականութեամբ, անասելի դժուարութիւններով, բայց անկոտրում նուիրումով ու հաստատակամութեամբ:
Անկախութեան երեսուն տարիները ձեռքբերումների, Արցախի ինքնորոշման համար պայքարի, փորձութիւնների, արժանապատիւ եւ ստեղծարար խաղաղութիւն հաստատելու տարիներ են եղել, որոնք ամրագրուել են Հայրենիքի անկախութեան, ազատութեան ու նրա խաղաղութեան համար հազարաւոր քաջորդիների բացարձակ նուիրումով, հայրենի հողն արեամբ արժեւորելու նրանց աննահանջութեամբ:
Պետականաշինութեան մեր յաջողութիւնների կողքին եղել են նաեւ բացթողումներ, որոնք, սակայն, խմբագրելի էին եւ չէին կարող սպառնալ մեր ինքնիշխան պետականութեանը:
Ցաւօք, վերջին երեք տարիներին ՀՀ-ում վարուող քաղաքականութիւնը լրջագոյն կորուստների յանգեցրեց` խաթարելով Հայաստան-Արցախ անվտանգային միասնական համակարգն ու սպառնալով ՀՀ ինքնիշխանութեանը:
Այսօր, աւելի քան երբեւէ, Անկախութեան երեսուներորդ տարեդարձին, մեզ` ողջ հայ ժողովրդին, միասնականութիւն, կամք եւ ոգի է անհրաժեշտ` մի կողմից գնահատելու անցեալի մեր ձեռքբերումները, արժեւորելու մեր պետականութեան կերտման ու պահպանման համար սերունդների ճիգը, հայրենի հողի համար թափուած հազարաւորների իմացեալ զոհաբերութիւնը, միւս կողմից` նոր վերելքի ուղիներ գտնելու եւ միասնաբար կասեցնելու երկրի կործանարար ընթացքը:
Սիրելի հայրենակիցնե՜ր, աշխարհասփիւռ հայե՜ր,
շնորհաւորում ենք ՀՀ Անկախութեան 30-ամեակի կապակցութեամբ եւ վստահեցնում, որ միասին կարող ենք Հայաստանին նոր զարթօնք ու յաղթանակներ բերել:
«ՀԱՅԱՍՏԱՆ» ԴԱՇԻՆՔ
21 Սեպտեմբեր 2021