14 Ապրիլ 2022_ին ՀՅԴ Բիւրօն հետեւեալ յայտարարութիւնը տարածեց՝ ՀՀ վարչապետ Փաշինեանի վերջին շրջանին Արցախի եւ Հայաստան_ Թուրքիա իրադարձութիւններուն նկատմամբ ունեցած դիրքորոշումներուն նկատմամբ. “13 Ապրիլի 2022-ին ՀՀ ԱԺ ամպիոնից իր ելոյթի ժամանակ Նիկոլ Փաշինեանի ինքնախոստովանական ցուցմունքները եւ Հայաստան-Ատրպէյճան, Հայաստան-Թուրքիա յարաբերութիւնների, Արցախի ու Հայաստանի Հանրապետութեան անվտանգային խնդիրների վերաբերեալ յայտնած դիրքորոշումները, փաստերի եւ իրողութիւնների նենգափոխումները վերջնականապէս բացայայտեցին վարչապետի պաշտօնը զբաղեցնողի ու իր վարչախմբի քաղաքական եւ բարոյական սնանկութիւնը։

Այլեւս կասկածից վեր է, որ Նիկոլ Փաշինեանը կայացրել է Արցախը Ատրպէյճանին յանձնելու եւ թուրք-ատրպէյճանական տանդեմի պահանջները բաւարարելու ազգակործան որոշում: Սակայն ո՛չ Նիկոլ Փաշինեանը, ո՛չ էլ որեւէ քաղաքական ուժ կամ անձանց խումբ չունի որևէ մանդատ Արցախի և արցախահայութեան փոխարէն կայացնելու նրանց ճակատագրի վերաբերեալ նման որոշում:

Ներկայացուող «խաղաղութեան» օրակարգը իրականում միտուած է վարչախմբի իշխանութիւնը երկարաձգելուն եւ յանգեցնելու է Արցախի եւ Հայաստանի համար լրջագոյն սպառնալիքների, անվտանգային նոր մարտահրաւէրների, նոր պատերազմի, նոր կորուստների, նոր զոհերի ու նոր յանձնողականութեան։

Արցախեան վերջին պատերազմի ընթացքում եւ դրանից յետոյ իշխանութիւնների ապաշնորհ ու ձախող վարքագիծը եւ տեղի ունեցող գործընթացները դրանց վառ վկայութիւնն են։ Ստեղծուած ծանրագոյն իրավիճակում բեկում կարող է յառաջանալ, երբ համազգային ներուժի մեկտեղմամբ դիմադրութիւն ցույց տրուի դաւադիր պայմանաւորուածութիւններով ու սպառնալիքներով հայ ժողովրդին պարտադրուող օրակարգերին: Հայաստանի գործող իշխանութեան հեռացումը եւ բանակցողի փոփոխութիւնը իրավիճակից դուրս գալու առաջին քայլն է:

Առ այդ,

1. Միջազգային հանրութեան, այդ թուում ԵԱՀԿ Մինսքի խմբի համանախագահ երկրների ուշադրութեանն ենք յանձնում, որ Նիկոլ Փաշինեանի կողմից ուղղակի կամ անուղղակի, բանաւոր կամ գրաւոր ձեւով Արցախը Ատրպէյճանի ենթակայութեանը յանձնելու որեւէ յանձնառութիւն ղեկավարութիւն չէ եւ առ ոչինչ է: Արցախի ժողովրդի` իր բնօրրանում ինքնորոշուելու իրաւունքն ամրագրուած է միջազգային իրաւական արարքներով, ինչը ԵԱՀԿ Մինսքի խմբի շրջանակներում, 2007 թուականից, որպէս սկզբունք դրուած է արցախեան հակամարտութեան խաղաղ կարգաւորման հիմքում:

2. Ուղերձ ենք յղում հայ ժողովրդին դիմագրաւելու ներքին ու արտաքին բոլոր սպառնալիքներին, չյուսահատուելու, չհամակերպուելու, լինելու միասնական, հաւատալու սեփական ուժերին ու պայքարելու՝ յանուն հայ ազգի իրաւունքների եւ շահերի: Տոկուն եւ անկոտրում արցախահայութեանը վստահեցնում ենք որ հայ ազգը զօրավիգ է իր արդա՛ր պայքարին։

3. Հաւատարիմ իր առաքելութեանը՝ Դաշնակցութիւնը իր համահայկական կառոյցով վճռական է այս պայքարում լինելու և՛ առաջամարտիկ և՛ զինուոր: Միաժամանակ յայտնում ենք մեր պատրաստակամութիւնը համագործակցելու բոլոր նրանց հետ, ովքեր պատրաստ են պայքարելու յանուն արժանապատիւ ու անվտանգ Հայաստանի ու Արցախի։

ՀՅԴ Բիւրօ

14.04.2022թ.”