Արցախի Ազգային Ժողովի բոլոր 5 խմբակցութիւնները հանդէս եկած են յայտարարութեամբ` «Հայաքուէ» օրէնսդրական նախաձեռնութեան մասին․
«Արցախի Հանրապետութեան Ազգային ժողովի բոլոր խմբակցութիւնները ողջունում են «համախմբում» շարժման «Հայաքուէ» օրէնսդրական նախաձեռնութիւնը եւ մաղթում յաջողութիւններ:
Հայաստանի Հանրապետութեան եւ Արցախի Հանրապետութեան կացութեան շուրջ ստեղծուած աննախադէպ իրավիճակում այդ օրէնսդրական նախաձեռնութիւնը կոչուած է կանխելու Արցախի ժողովրդի հաւաքական կամքի դրսեւորման անբեկանելի իրողութիւնը շրջանցելու որեւէ նկրտում: Ան երաշխաւորում է հայ մարդուն իր Երկրի ճակատագրական հարցերի լուծմանն անմիջական մասնակից լինելու սկզբունքային խնդիրը: Արցախի կարգավիճակը, ըստ այդմ էլ` արցախցիների անվտանգ ապրելու հիմնարար իրաւունքի ապահովելը ՀՀ ներքին եւ արտաքին քաղաքականութեան առանցքային բաղադրիչը պէտք է լինի: Լիայոյս ենք, որ խելամիտ համակողմանի քայլերի արդիւնքում «Հայաքուէ»-ն նշուած ուղղութիւններում կ’ունենայ առանցքային նշանակութիւն: Սա ժողովրդի իշխանութեան օրինակելի նախաձեռնութիւն է, քանզի «ամբողջ իշխանութիւնը պատկանում է ժողովրդին» արտայայտութիւնը ոչ թէ մերկապարանոց լոզունգ է, այլ կիրառման ենթակայ հզօրագոյն գործիք:
Արցախը չի ընկրկելու թշնամու առջեւ, թոյլ չենք տալու մեր ազգային ազատագրական արդար պայքարը անամօթաբար «ահաբեկչութիւն» անուանել իրաւունքի հանրաճանաչ ձեւաչափերով ամրագրուած մեր հիմնարար իրաւունքների համար մղուող պայքարի ոգին:
ելակէտ ընդունելով այն, որ համազգային խնդիրները հարկ է լուծել բացառապէս համազգային ընթացակարգերով, մէկ անգամ եւս պէտք է արձանագրուի, որ Արցախի ժողովուրդն ազատ եւ անկախ ապրելու իր կամքն ամրագրել է 1991թ․ ԼՂՀ-ի Հռչակագրով, 1991թ․ հանրաքուէի արդիւնքներով, 1992թ․ ԼՂՀ-ի պետական անկախութեան մասին Հռչակագրով: Արցախի ժողովրդի իւրացուած ինքնորոշման իրաւունքի փաստի որեւէ խմբագրում հնարաւոր է բացառապէս ժողովրդական կամարտայայտութեամբ, ուստի, առանձին անձինք եւ շրջանակներ իրաւասու եւ լիազօրուած չեն վճռահատելու համազգային առանցքային հարցերը:
Աստուած պահապան մեր Հայրենիքին եւ մեր հայրենակիցներին»:
«Ազատ Հայրենիք-ՔՄԴ» խմբակցութիւն
«Միասնական Հայրենիք» խմբակցութիւն
«Արդարութիւն» խմբակցութիւն
«ՀՅ Դաշնակցութիւն» խմբակցութիւն
«Արցախի ժողովրդավարական» խմբակցութիւն