«Երկիր».- Արցախի Ազգային Ժողովը 25 Մարտին տեղի ունեցած լիագումար նիստով ընդունած է, որ Լեռնային Ղարաբաղի Հանրապետութեան պաշտօնական լեզուներն են` գրական հայերէնը եւ ռուսերէնը:
Քննարկումին լայն առարկայ դարձած օրէնքի նախագիծը բազմաթիւ բացասական արձագանգներ ունեցած է` զայն համարելով անտեղի քծնանք ու Արցախի հայկականութիւնը սպառնացող երեւոյթ: Քուէարկութեան օրը համահեղինակներէն Մետաքսէ Յակոբեան յայտարարած է, որ հրաժարած է համահեղինակ ըլլալէ եւ չի մասնակցիր քուէարկութեան:
Հասարակական հնչեղութիւն ստացած նախագիծի մասին Համահեղինակները միայն մէկ հանրային քննարկում կազմակերպած էին: Հասարակութեան տարբեր շերտերու կարծիքները վեր հանելու համար կլոր-սեղան քննարկում նախաձեռնած է նաեւ ՀՅԴ Արցախի Երիտասարդական Միութիւնը: Այդ քննարկումին ներկաները յայտնած են, որ օրինագիծը լրացուցիչ ուսումնասիրութեան կարիք ունի եւ կարելի չէ այդ բովանդակութեամբ ընդունիլ:
Այնուհանդերձ, 27 կողմ, 2 ձեռնպահ ձայներով օրէնքի փոփոխութիւններու նախագիծը ընդունուած է: «Հայ Յեղափոխական Դաշնակցութիւն» խմբակցութիւնը ձեռնպահ քուէարկած է:
