«Ապառաժ».-Շուշիի քաղաքապետի թեկնածու, ՀՅԴ անդամ Սամուէլ Աղաջանեան 30-31 Օգոստոսին հանդիպումներ ունեցած է Շուշիի շարք մը մշակութային եւ կրթական օջախներու աշխատակիցներուն հետ:
Շուշի Ստեղծագործական կեդրոնի եւ «Շուշի քաղաքի թանգարաններ» պետական ոչ առեւտրային կազմակերպութեան աշխատողներուն հետ հանդիպումներուն ընթագքին Սամուէլ Աղաջանեան կարեւոր համարած է բերդաքաղաքի արժանապատիւ ապագան կերտելու ճանապարհին մշակութային եւ զբօսաշրջային կառոյցներու բարելաւումն ու նորերու հիմնումը:
Շուշիի բնակիչները քաղաքին մէջ առկայ փլած, լքուած շինութիւններու օգտագործման, վերանորորգման հարցերը արծարծած են: Սոյն հարցը գրաւած էր նաեւ Սամուէլ Աղաջանեանի ուշադրութիւնը, որ ընտրուելու պարագային թեկնածուն խոստացած է հետամուտ ըլլալ հարցի լուծման: