ՀՀ Ազգային Ժողովի «Լուսաւոր Հայաստան» խմբակցութեան պատուիրակութիւնը Արցախ մեկնած են: Այցելութեան ընթացքին հանդիպումներ տեղի ունեցած են ԱՀ Ազգային Ժողովի նախագահի, Ազգային Ժողովի խմբակցութիւններուն հետ:
8 Յունուարին «Լուսաւոր Հայաստան» խմբակցութեան պատգամաւորներ Էտմոն Մարուքեան եւ Տարօն Սիմոնեան հանդիպում ունեցած են ԱՀ Ազգային Ժողովի «Հայ Յեղափոխական Դաշնակցութիւն» խմբակցութեան պատգամաւորներ Վահրամ Պալայեանին եւ Դաւիթ Իշխանեանին հետ:
Հանդիպումի ընթացքին Էտմոն Մարուքեան յայտնած է, որ Արցախ կատարած այցելութեան նպատակը տեղւոյն իրավիճակին ծանօթանալն ու իրենց օրակարգին մէջ արծարծուած հարցերը ներառելն է:
ՀՅԴ խմբակցութեան անդամները կարեւոր համարած են ՀՀ եւ ԱՀ բնակչութեան անվտանգութեան ապահովումը, որ ուղղակիօրէն կ’առնչուի գործող իշխանութիւններուն հեռացումին հետ:
Բացի ՀՀ եւ ԱՀ բնակչութեան անվտանգութեան հարցերէն, հանդիպումի ընթացքին քննարկուած են ներքաղաքական զարգացումներուն, յետագայ ընելիքներուն վերաբերող հարցեր: