7 Յունիսին, Հայաստանի Հանրապետութեան նախագահ Արմէն Սարգսեան կոչ ուղղած է նախընտրական քարոզարշաւի մեկնարկին առիթով, ուր յայտնած է. «Այսօր Հայաստանի Հանրապետութեան մէջ պաշտօնապէս մեկնարկած է Ազգային ժողովի արտահերթ ընտրութիւններու նախընտրական քարոզարշաւը: Այս ընտրութիւնները տեղի կ’ունենան բացառիկ բարդ եւ ճգնաժամային պայմաններու մէջ, մեր ժողովուրդն ու պետութիւնը կ’անցնին դժուարին փորձութիւններու մէջէն: Ընտրութիւններուն մասնակցելու յայտ ներկայացուցած բոլոր կուսակցութիւններուն եւ դաշինքներուն կոչ կ’ուղղեմ ըլլալու առաւելագոյնս զուսպ, յարգելու ընտրողը ու մրցակիցը, ցուցաբերելու խոհեմութիւն ու հանդուրժողականութիւն, ընտրական գործընթացը կատարելու քաղաքակիրթ քաղաքական մշակոյթի մթնոլորտի մէջ: Կ’առաջարկեմ բոլոր քաղաքական ուժերուն, որ իրենց գործունէութեամբ, պահուածքով եւ խօսքով չխորացնեն ճգնաժամը, չհատեն բարոյականութեան սահմանները, տուրք չտան քարոզչական անազնիւ արհեստագիտութեան, հաւատարիմ մնան մեր ազգային արժէքներուն ու հաւաքական նպատակին: Պետական բոլոր կառոյցները պարտաւոր են առաւել պատասխանատուութեամբ վերաբերելու իրենց պարտականութիւններուն գծով: Յատկապէս մեծ պատասխանատուութիւն ունին իրաւապահ մարմինները: Անոնք պարտաւոր են գործելու մեծ պատասխանատուութեամբ ու մասնագիտութեամբ՝ երաշխաւորելու օրինականութիւնն ու իրաւունքի գերակայութիւնը, ապահովելու հասարակական կարգը, ընտրութիւններու բնականոն ընթացքը: Կը դիմեմ բոլոր ընտրողներուն՝ ընտրութիւններուն աշխուժօրէն մասնակցելով դրսեւորելու մեր վերաբերմունքը քաղաքական այս կամ այն ուժին, այս կամ այն քաղաքական գործիչին հանդէպ՝ խորապէս գիտակցելով, որ ընտրութիւն կը կատարենք մեր երկրի ապագային, զարգացման հեռանկարին, մեր սերունդներու բարեկեցութեան համար: Յաջողութիւն մաղթելով ընտրութիւններուն մասնակցող բոլոր կուսակցութիւններուն եւ դաշինքներուն՝ կ’ուզեմ յիշեցնել, որ այս ընտրութիւնները, արտահերթ եւ նաեւ արտակարգ, երկրի համար բախտորոշ ըլլալով հանդերձ, բնականոն քաղաքական գործընթաց են, որուն պէտք է վերաբերիլ մեծ պատասխանատուութեամբ, եւ որմէ Հայաստան պետութիւնը եւ մեր ժողովուրդը պէտք է արժանապատուութեամբ դուրս գան»: