Այս տարի Հալէպի ծիրանը առատ է եւ հիւթեղ, սակայն նորութիւն կ’ըլլա՞յ եթէ ըսեմ որ միրգի իսկական բնօրրանը մեր հայրենիքն է։ Ինչպէս Արարատեան դաշտին մէջ աճող եւ կարմիր ներկի համար օգտագործուող որդան միջատը, նոյնպէս ալ ծիրանը անվարան կարելի է յայտարարել բնիկ հայկական։ Հետաքրքրական է, թէ լատիներէնի մէջ ծիրանը կը կոչուի «Armeniaca», այսինքն՝ հայկական միրգ։ Հայ գեղջուկի «Հոռովել»ին չափ հինուց երգուած է Ջիւանիի «Ես մի ծառ եմ ծիրանի»ն, ուր կը յիշուի, թէ ծիրանենին հայկական լեռնաշխարհի տարածքին ունի 4000 տարուան պատմութիւն։
Հին ժամանակներուն ծիրանը հարուստ թագաւորական ընտանիքներուն վայել ու հաճելի պտուղն էր։ Թերեւս այս պատճառով ալ թագաժառանգներուն կրած կարմիր թիկնոցը կոչուած է «ծիրանի»։
Ամրան գալուստը աւետող այս միրգը իսկապէ՛ս օգտաշատ է, ունի նաեւ բուժիչ յատկութիւն։ Համաձայն վերջերս կատարուած ուսումնասիրութեան մը, ծիրանի կորիզը կ’օգտագործուի հակաքաղցկեղային դեղորայքի պատրաստման ընթացքին։ Փաքիստանի հիւսիսային սահմանին վրայ, Հիմալայեան լեռներու լանջին ապրող Հունզաները երկարակեաց ժողովուրդ են, անոնք կ’ապրին մինչեւ 140 տարի։ Գաղտնիքը ըսե՞մ, ծիրանի կորիզներու առատ օգտագործումը իրենց սննդականոնին մէջ։
Բայց գիտէի՞ք, թէ յատկապէ՛ս ծիրանի ծառի տախտակով կը պատրաստուի հայկական հրաշք նուագարանը՝ տուտուկը։ Աշուղական երգերու համն ու հոտն է կրկնակի եղէգով պատրաստուած այս փողային նուագարանը, որ կը կոչուի նաեւ ծիրանափող։ Աւելի ուշ, անոր տարբերակները յայտնաբերուած են Կովկասի եւ Միջին Արեւելեան երկիրներու մէջ։
Հայկական տուտուկի ու երաժշտութեան պատմութիւնը նոյնքան հին են, որքան Տիգրան Մեծի գահակալութիւնը (Քա. 95-55 թուականներ)։Այս նուագարանի մասին յիշատակութիւն կայ նոյնիսկ Միջին դարերու հայկական ձեռագիրներուն մէջ։ Աշխարհահռչակ երգահան Եաննիի յայտարարութեամբ, տուտուկը բոլոր նուագարաններուն մէջ ամէնէն հայկականն է ու հայ ժողովուրդի ներաշխարհի լիիրաւ թարգմանը։ Տուտուկը հայու ոգիի ձայնն է։ Այս մասին հայ մեծ երգահան Արամ Խաչատուրեան եւս կը վկայէ. «Տուտուկը միակ երաժշտական գործիքն է, որ կը յուզէ ներաշխարհս»։
Ցաւօք, այս օրերուն հայ ժողովուրդը գուժեց վարպետ տուտուկահար եւ համաշխարհային մրցանակներու արժանացած անձնաւորութեան մը՝ Ջիւան Գասպարեանի մահը։ Շատ յաճախ անոր կատարողութեամբ, հայկական տուտուկի երաժշտութիւնը լսելի դարձած է յայտնի շարժապատկերներու մէջ, ինչպէս՝ «Gladiator, 2000» «Avatar, 2009», «Արարատ,2002», «The Passion of Christ, 2004», «Մայրիկ, 1991», «Troy, 2004» եւ այլուր։
Յարգանք վաստակիդ, լոյս շիրիմիդ, անզուգակա՛ն վարպետ։
2005 թուականին UNESCO-ն հայկական տուտուկը յայտարարեց որպէս մարդկութեան ոչ-նիւթական ժառանգութեան գլուխ գործոցը։
Սիւզի Խշուաճեան