Հայաստանի խորհրդարանական ընտրութիւններու արդիւնքին ի տես, չէի կրնար անձայն անցնիլ եւ չարձանագրել հետեւեալ մտածումները։
Այսպէս, խորհրդարանական ընտրութեան գիտական, վիճակագրական եւ հետազօտական բոլոր կանխատեսումներու կարելի արդիւնքները, վստահ բախտագուշակի (Պախըմճի) գործի չէին նմաներ։ Որոշ գիտական արժեչափեր կան, որոնց ներքեւ կը ձեւաւորուին այդ աշխատանքները։ Նաեւ, եկէ՛ք ընդունինք, որ ամէն մէկ հետազօտական-վերլուծական հաստատութիւն, այդքա՜ն ալ անկողմնակալ կամ անաչառ չըլլար իր մօտեցումներուն մէջ, հաշուի առնելով զինք հովանաւորող պետութեան կամ միջազգային կեդրոններու «ճաշակով» ներկայացնելու տուեալ ուսումնասիրութիւնները-ուրուագծումները։
Սակայն, չկայ օրինակ մը քաղաքական կեանքին մէջ, ուր գիտական մօտեցումներով ընտրական կանխատեսումներու թիւերն ու տոկոսները, իրականացուած եղելութեան մը պատկերէն մեծ տարբերութիւն արձանագրէին՝ յաղթական հռչակուող կողմին ի նպաստ։ Հայաստանի պարագային, բոլոր կանխատեսումները կը խօսէին աւելի մօտ եւ մրցունակ թիւերու մասին, պայքարող քաղաքական հիմնական երկու խմբաւորումներու միջեւ:
Անձնապէս հրապարակային իմ ելոյթներով, ջատագովը չեմ եղած վարչապետի աթոռը զբաղեցնող անձնաւորութեան վարած քաղաքականութեան։ Սակայն, հետեւելով գետնի վրայ զարգացումներուն եւ աշխարհաքաղաքական «նախասիրութիւններու ճաշակի» վարկածին՝ զսպելով մէջս համեցող անձնական հակումները, հաւանական կը տեսնէի քանի մը տոկոսով առաւել արձանագրելու պատկեր մը՝ իշխող ուժին ի հաշիւ։ Կանխատեսուած կարելի այդ արդիւնքը, ամենեւին Փաշինեանին ու իր ներկայացուցած խումբին կարելիութիւն պիտի չտար ձեռք բերելու մեծամասնութիւն եւ կազմելու կառավարութիւն։ Բոլոր լուրջ հետազօտական կեդրոնները կը տեսնէին ընտրութեան երկրորդ փուլի անխուսափելի հանգրուան մը, ուր պիտի վճռուէր այս արտահերթ ընտրութեան ճակատագիրը։
Պէտք է ընդունինք մէկ իրականութիւն, որ այս ամէնուն մէջ փաշինեանական «Պախըմճի»ները ճիշդ դուրս եկան իրենց մեծախօսիկութեամբ։ Աճպարարի մը բոլոր հնարքները ի գործ դրուեցան եւ շինծու իրականութեան մը արդիւնքները կուպրով կրկին զարդարեցին շատ գովերգուած հայկական ժողովրդավարութեան պաստառը։
Gallup-ի նման հետազօտական կեդրոններու եւ միջազգային բոլոր լրատուամիջոցներու կանխատեսումները ի դերեւ ելան։ Ի տես յայտարարուած պաշտօնական թիւերուն, պէտք է հարց տալ անոնց, թէ իրենց քաղած տեղեկութիւնները որքանո՞վ հաւաստի են եւ Երկիր մոլորակի աղբիւրներէ սնանծ։ Վերջապէս, նուազ կամ առաւել չափով այդ տոկոսներու տրամաբանական տարուբերումները պէտք է բացատրել ու հասկնալ, մտահան չընելով այդ հաստատութիւնները հովանաւորող կողմերու երբեմն թաքուն, երբեմն ա՛լ յականէ յանուանէ հասցէագրուած էութիւնը։
Այլ հանգամանքներու վրայ պիտի չկեդրոնանամ եւ միայն այս առարկութեամբ պիտի փորձեմ հայ հասարակութեան ուշադրութեան կիզակէտը դարձնել տուեալ երեւոյթը։ Այդ մէկն ա՛լ ընդգծեմ, որ հրաշագործութեան հաւատացող չեմ, որպէսզի նաե՛ւ տեսնեմ ընտրութեան վերջին օրուան մէջ Աստուածային միջամտութիւն, Հոգեգալստեան Pentecoste օրուան նման բնազանցական ազդու հնարք, համայն ընտրազան-գուածը իր քուէն ուղղորդելու Փաշինեանի հաշւոյն, որուն արդիւնքով առկայ իշխանութիւնը ստացաւ «շռնդալից յաղթանակի» յայտարարուած այս պատկերը։
Եթէ տրամաբանական թիւերով խօսուէր ու ներկայացուէր մրցունակ պատկերի մօտ արդիւնքներ, գլուխ պիտի խոնարհեցնէի «ժողովուրդի կամքին առաջ» եւ բարձրաձայն պիտի աղաղակէի՝ «ձայն բազմաց, ձայն Աստուծոյ»։
Այսուամենայնիւ, ընտրութեան գործընթացին հսկող միջազգային դիտորդներու տեսակէտները եկան վկայելու արդիւնքներուն վաւերականութեան մասին։ Վերեւ մատնանշած նոյն հարցադրումներս իրենց ա՛լ ուղղելով կու գամ հաստատելու, որ լեռը որոտաց, բայց մուկ ծնաւ: Իսկ Ջիւանի բառերով պիտի ըսէի՝ «յղի է, ծնելու մօտ է, գոռում է սարը ահագին, Տայ Աստուած, որ ծնի առիւծ եւ ոչ փոքրիկ մի մուկ չնչին»։ Չեմ ուզեր այս բառերով նսեմացնել Փաշինեանի անձը, սակայն տրամաբանութեանս մէջ, կ’ուզեմ արդարացնել հողատուի կեղծ եւ շինծու տեղեկութիւններով պատերազմ ղեկավարողի եւ մահացու մեղքերու մէջ թաթխուած առաջնորդի կերպարին «շռնդալից վերընտրութեան» հանգամանքը։
Մեղքը չեմ ուզեր բարդել այն խեղճացած զանգուածին վրայ, որ միայն իր կուշտին «տարտով» կ’ապրի: Հարցը այդ ստրկացած զանգուածէն ա՛լ անդին է։ Ամէն գնով իշխանութիւն պահելու մոլուցքին մէջ պէտք է տեսնել բացակայ օղակը: Անոնց մէջ, որոնք չարդարացուցին անարիւն յեղափոխութեան լոզունգները, հաշուետութեան եւ արդար համակարգի գերիշխանութեամբ օժտելու «նոր Հայաստանը»:
Քաղաքական տուայտացող դաշտը կը սպասէր, որ ազգի ճակտէն պարտուողականութեան խարանը մաքրուէր եւ դէմ յանդիման կանգնէինք քաղաքակիրթ մարդկութեան դիմաց՝ ճակատաբաց, առանց ամօթի բարդոյթի։
Գալիք օրերը դիմակայենք ամերիկացի գրող Օկտաւիա Պաթլըրի այս յարիր մտածումներով՝ «Ընտրեցէ՛ք ձեր ղեկավարներուն իմաստութեամբ եւ նախամտածուածութեամբ: Վախկոտով առաջնորդուիլը կը նշանակէ՝ վերահսկուիլ այն ամէնով, որմէ վեհերոտը կը վախնայ: Յիմարով առաջնորդուիլը կը նշանակէ՝ առաջնորդուիլ յիմարին վերահսկող պատեհապաշտներու կողմէ: Գողի մը կողմէ առաջնորդուիլը կը նշանակէ մատուցել ձեր ամենաթանկ գանձերը գողցողին: Ստախօսի կողմէ առաջնորդուիլը կը նշանակէ նաեւ ստելը ընդունիլ: Բռնապետի կողմէ առաջնորդուիը կը նշանակէ՝ ստրկութեան վաճառել ինքդ քեզ եւ այն բոլորը զորս կը սիրէք»:
Իրերու դասաւորումով, որոնց մէջ միջազգային մութ ուժեր իրենց փայը ունէին, սուտի եւ կեղծիքի նոր զաւեշտական արար մըն ա՛լ այսպէս լրումին հասաւ։ Յուսանք այս ձեւակերպումը հայ ազգի պատմութեան էջերուն մէջ մուրով արձանագրուած վերջին եղելութիւնը կ’ըլլայ։
Սպասելով ոսկետառ յաղթական նուաճումներու, որոնք հպարտութեամբ պիտի արձանագրուին պատմութեան մատեաններուն մէջ: Պինդ մնացէ՛ք։
Թորոնթօ- 27 Յունիս 2021
Ժան Հալլաճեան