1
Մակոյկը մինակ
մակոյկը կոչնակ 
մենք բեղմն-
հովին տրուած մակոյկք
2
Կապոյտը մուգ սպունգ
-ջուրէ մուր-
մենք գինեխում
մենք խորու՜նկ կապոյտ
3
Գիշերը ձկան մաղ
գիշերը սեւ հայելի-
մենք խոր վէրքի աղ
մենք ալեբեր գիշեր
4
Խիճերու շարն ընդ ծով
ճակատագրի գիծ
մենք բախտագուշակ ափ-
մենք ընդերկար խիճ
Պանիաս
«ԱլԵուշա’ Ճաշարան»
30.05.2021
*
Նայած
թէ ի՞նչ կայ
սրտին 
մէջ,
խի՞ճ կայ
թէ՞ խիղճ
Եթէ կան
շատ խիճեր
ուրեմն
սիրտ չէ ատիկա
այլ գանձանակ մը
անբանալի
Եթէ կայ
անսպառ խիղճ
ուրեմն
սիրտ չէ ատիկա
այլ աղբիւր մը
անյագուրդ
Նայած,
նայած թէ
ի՞նչ կայ
միջուկին մէջ՝
փշո՞ւր
թէ՞ զուլալ ջուր
05.09.2021
Հալէպ
ԱՆԿՈՂՄՆԱԿԱԼ
Շուքդ
նոյն տեղը կ’իյնայ
չի զանազաներ
ճակա՞տդ է պատին
թէ՞ դէմքդ՝ արեւին
շուքդ նոյն
որ այդքան
ծանր կը կարծէիր
14.01.2022
Երեւան
Յարվարդ