4 Յուլիսին Թուրքիոյ խորհրդարանին մէջ տեղի ունեցաւ վերընտրուած նախագահ Ռեճէպ Թայիպ Էրտողանի երդմնակալութեան արարողութիւնը։ Նոյն օրը Էրտողան մամլոյ ասուլիսի ընթացքին յայտարարեց նոր կառավարութեան կազմը:
Պաշտպանութեան նախարար նշանակուած է Հուլուսի Աքարը, որ նախապէս կը վարէր Թուրքիոյ զինեալ ուժերու սպայակոյտի պետի պաշտօնը:
Էրտողան ելեւմուտքի նախարար նշանակած է իր փեսան՝ Պերաթ Ալպայրաքը, որ նախապէս կը գլխաւորէր Ուժանիւթի եւ Բնական Պաշարներու Նախարարութիւնը:
Առեւտուրի նախարար նշանակուած է Ռուհսար Փեքճանը: Էրտողանի օգնականներէն Մուսթաֆա Վարանք ստանձնած է Ճարտարագիտութեան եւ Զարգացման Նախարարութեան ղեկավարութիւնը: Ուժանիւթի փոխնախարար Ֆաթիհ Տէօնմեզ նշանակուած է ուժանիւթի նախարար, իսկ Մայրուղիներու տնօրէնութեան նախկին ղեկավար Ճահիթ Թուրան նշանակուած է փոխադրամիջոցներու նախարար:
Ըստ թրքական լրատուամիջոցներու, Թուրքիոյ արտաքին գործոց նորանշանակ նախարար Հաքան Ֆիտան, ամենայն հաւանականութեամբ, պիտի ձգտի աշխուժացնել Միջին Արեւելքի եւ Հիւսիսային Աֆրիքայի տարածաշրջանի պետութիւններու հետ կապերու ամրապնդման ոլորտի Անգարայի քաղաքականութիւնը՝ շարունակելով թրքական հետախուզութեան ղեկավարի նախկին պաշտօնի իր ուղղութիւնը:
Ընդհանուր առմամբ, նոր կառավարութեան կազմին մէջ ընդգրկուած է 16 նախարար, ինչ որ 10-ով նուազ է, քան նախորդ կազմին մէջ: