ՀՅԴ Հայաստանի 24-րդ Գերագոյն ժողովը քննելով Հայաստանի Հանրապետութիւնում ստեղծուած քաղաքական եւ անվտանգային իրավիճակը, տեղի ունեցած ընտրական եւ հետընտական գործընթացները, երկրում առկայ բարոյահոգեբանական մթնոլորտը
արձանագրում է, որ`
– Խորհրդարանական ընտրութիւնները չհանգուցալուծեցին երկրում արդէն տեւական ժամանակ շարունակուող քաղաքական եւ ներհասարակական ճգնաժամը:
-Երկիրը պարտութեան հասցրած իշխանութիւնը, յունիսի 20-ին կայացած ԱԺ արտահերթ ընտրութիւններում զանգուածաբար գործի դնելով վարչական, ֆինանսական լծակները, կեղծիքները, հանրութեանը մոլորեցնելու, ապատեղեկացնելու բոլոր անթոյլատրելի մեթոդները, կարողացաւ վերարտադրուել, ինչը լրջագոյն մարտահրաւէր է մեր ազգային անվտանգութեան եւ պետականութեան համար:
– ԱԺ արտահերթ ընտրութիւններում Հայ Յեղափոխական Դաշնակցութիւնը գործընկերների հետ ձեւաւորեց «Հայաստան» դաշինքը, իր բազմահազար նուիրեալ շարքերով վճռական մասնակցութիւն ունեցաւ ընտրապայքարին, իսկ ,հայաստանէ դաշինքը դարձաւ այս իշխանութիւնների իրական եւ գլխաւոր այլընտրանքը:
– Յետընտրական շրջանում օրուայ իշխանութիւնը շարունակում է հանրութեան պառակտման, երկրում ջրբաժանների խորացման, քաղաքական հետապնդումների սանձազերծման, Արցախեան հիմնախնդրի անտեսման, երկրի անվտանգային համակարգի միտումնաւոր քայքայման, ազգային արժէքների եւ հաստատութիւնների դէմ կազմակերպուած արշաւի քաղաքականութիւնը:
– Վտանգաւոր չափերի են հասնում արտագաղթի ծաւալները, ինչն ուղղակի հարուած է մեր պետականութեանը:
ՀՅԴ Հայաստանի Գերագոյն Ժողովը, ելնելով ստեղծուած իրավիճակից, յայտարարում է`
– Հետամուտ է լինելու հայրենադաւ իշխանութեան հեռացման պայքարին, հանդէս է գալու իբրեւ արմատական ընդդիմութիւն, գործադրելու է քաղաքական պայքարի բոլոր հնարաւոր միջոցները:
– Հիմք ընդունելով ,հայաստանէ դաշինքի համագործակցութեան Հռչակագիրը, կարեւորելով եւ գնահատելով Դաշինքի ձեւաւորումը ու շարունակուող սերտ եւ արդիւնաւէտ համագործակցութիւնը` յարգանքի եւ վստահութեան հենքով շարունակելու է գործընկերութիւնը համատեղ ուժերով ընդհանուր նպատակների իրագործման ուղղութեամբ:
– Հաւատարիմ է լինելու Արցախի Հանրապետութեան անկախութեան ճանաչման, տարածքային ամբողջականութեան վերականգման, տեղահանուած անձանց իրաւունքների պաշտպանութեան պայքարին:
– Վճռականօրէն հակազդելու է մեր երկրի տարածքային ամբողջականութիւնը, սահմանների անձեռնմխելիութիւնը եւ ինքնիշխանութիւնը վտանգող գործընթացներին, ՀՀ զինուած ուժերի կազմաքանդմանն ուղղուած եւ ազգային-հոգեւոր հաստատութիւնների, Հայաստանեաց Առաքելական Սուրբ Եկեղեցու դէմ իրականացուող` օրուայ իշխանութիւնների քօղարկուած եւ բացայայտ քայլերին ու գործողութիւններին:
– Գործադրելու է բոլոր ջանքերը հանրային համախմբուածութեան ամրապնդման, ապազգային, հակապետական դրսեւորումների դէմ ազգային դիմադրական ցանցային շարժում ձեւաւորելու ուղղութեամբ:
– Մշտապէս ուշադրութեան ներքոյ է պահելու մեր հայրենակիցների իրաւունքների պաշտպանութեան, սոցիալական խնդիրների լուծման հարցերը:
– Ընդդիմանալու է Հայաստանի եւ Սփիւռքի միջեւ խզում առաջացնելու եւ պառակտում սերմանելու, կայացած աւանդական կառոյցների դերակատարութեան նսեմացման փորձերին:
ՀԱՅՐԵՆԻՔԸ` Հայաստանի եւ Արցախի Հանրապետութիւնները, Հայոց բանակը, մեր ժողովրդի ապագան վտանգի մէջ են:
Հայ Յեղափոխական Դաշնակցութիւնը կոչ է անում կուսակցական շարքերին, երկրի ապագայով մտահոգ մեր հայրենակիցներին` շարունակել վճռական պայքարը` օր առաջ հայրենադաւ իշխանութիւններին հեռացնելու եւ ուժեղ Հայաստան կառուցելու համար:
ՀՅԴ Հայաստանի 24-րդ Գերագոյն ժողով
Երեւան
05 Յուլիս 2021թ.