Հայ Դատի Մոսկուայի գրասենեակը հրապարակած է հետեւեալ հաղորդագրութիւնը.
ՀՅԴ Հայ Դատի Մոսկուայի գրասենեակը խստիւ դատապարտում է Սիրիայի հիւսիս-արեւելեան շրջաններում Թուրքիայի կողմից սանձազերծուած ռազմական գործողութիւնները, որոնց հետեւանքով տարածաշրջանում աճում է նոր պատերազմի սպառնալիք եւ վտանգւում են տասնեակ հազարաւոր խաղաղ բնակիչների, այդ թւում` հայերի կեանքն ու անվտանգութիւնը:
Ցեղասպան Թուրքիան միջազգային հանրութեան անտարբերութեան եւ լուռ համաձայնութեան ներքոյ շարունակում է իր ոճրագործութիւնները` շիկացնելով առանց այդ էլ պայթիւնավտանգ հակամարտութեան գօտին: Այս յարձակողապաշտ քաղաքականութեամբ Թուրքիան նոր շունչ է հաղորդում տասնեակ հազարաւոր մարդկային զոհերի գնով սանձազերծուած <<Իսլամական պետութիւն>> կոչուած ահաբեկչական խմբաւորման մնացորդներին եւ ցանկանում է վերականգնել իր ապակառուցողական ազդեցութիւնը հակամարտութեան գօտում: Այսպիսով, Թուրքիան, ահաբեկչութեան դէմ պայքարի անուան տակ, ստեղծում է ռազմական գործողութիւնների սրման, ջարդերի եւ տեղահանութեան, ահաբեկչական խմբաւորումների աշխուժացման եւ մարդկային աղէտի նոր վտանգ:
Այս գործողութիւններն ուղղակիօրէն հակասում են մարդու իրաւունքներին, Սիրիայի, որպէս ինքնավար պետութեան, տարածքային ամբողջականութեանն ու հակամարտութիւնների խաղաղ կարգաւորմանն ուղղուած միջազգային բոլոր որոշումներին: Սա մի գործընթաց է, որի զարգացումը իր հերթին կը ծնի նոր մարտահրաւէրներ եւ որը յղի է տարածաշրջանային անվտանգութիւնը խարխլելու վտանգով:
Հայ Դատի Մոսկուայի գրասենեակը կոչ է անում Ռուսիոյ Դաշնութեան Նախագահին, ՌԴ Պետական Տումային, ՌԴ Դաշնային Խորհրդին եւ ՌԴ Արտաքին Գործոց Նախարարութեան` գործի դնելու բոլոր հնարաւոր լծակները` կանխելու համար Թուրքիայի կողմից Սիրիայի Արաբական Հանրապետութեան դէմ սանձազերծուած զինուորական գործողութիւնները, այդ գործողութիւններից տուժած խաղաղ բնակչութեանը տրամադրել մարդասիրական աջակցութիւն եւ միջոցներ ձեռնարկել հետագայ բռնութիւնները կանխելու եւ հակամարտութիւնը բացառապէս խաղաղ միջոցով կարգաւորելու ուղղութեամբ: Մենք իրաւունք չունենք թոյլ տալու 1915-1923 թուականների ցեղասպանութեան կրկնութիւնը:
Հայ Դատի Մոսկուայի գրասենեակը Ռուսիոյ Դաշնութիւնում բնակուող հայութեանը կոչ է անում ամէն կերպ սատարել Թուրքիայի յարձակումների արդիւնքում տուժած հայկական բնակչութեանը` մեղմելու ահագնացող մարդկային աղէտն ու վերականգնելու զինուորական ներխուժումից տուժած բազմահազարանոց հայկական համայնքի բնականոն կեանքը:
Մենք հաւատում ենք, որ քաղաքակիրթ աշխարհը, այդ թւում նաեւ Ռուսիոյ Դաշնութիւնը, ոչ միայն կը դատապարտեն, այլեւ յաւուր պատշաճի գնահատական կը տան սանձազերծուած բռնութիւններին եւ ուղղակի քայլերով կը կանխեն մարդկութեան դէմ ուղղուած այս ոճրագործութիւնը:
ՀՅԴ ՀԱՅ ԴԱՏԻ ՄՈՍԿՈՒԱՅԻ ԳՐԱՍԵՆԵԱԿ