«Ազատ Օր».-Արցախի Ազգային ժողովի պատգամաւոր եւ ՀՅԴ Արցախի Կեդրոնական Կոմիտէի ներկայացուցիչ Դաւիթ Իշխանեան, 5 եւ 6 Նոյեմբեր 2019-ին, Աթէնք գտնուեցաւ եւ ունեցաւ շարք մը հանդիպումներ յունահայ գաղութի կառոյցներու պատասխանատուներուն հետ։
Երեքշաբթի՝ 5 Նոյեմբերի առաւօտուն, Իշխանեան եւ իր տիկինը այցելեցին «Ազատ Օր»ի խմբագրատուն եւ մօտէն ծանօթացան յունահայ օրաթերթի հրատարակութեան աշխատանքներուն։ Իր այցելութեան առիթով Իշխանեան շահեկան հարցազրոյց մը տուաւ թերթին։
Նոյն օրը, Արցախի պատգամաւորն ու իր տիկինը առիթը ունեցան այցելելու Հ.Կ.Խաչի «Ճէնազեան», «Յակոբեան» եւ «Զաւարեան» ազգային վարժարանները եւ ծանօթանալու աշակերտութեան ու ուսուցչական կազմերուն։ Փոքրիկները հետաքրքրութեամբ մօտեցան Արցախի հիւրին եւ լսեցին անոր պատգամներն ու թելադրանքները՝ հայու ինքնութիւնը եւ Արցախի հերոսական պատմութիւնը իրենց սրտերուն մէջ պահելու համար։
Իշխանեան յորդորեց աշակերտներուն այցելել Արցախ, զգալ մեր արծուաբոյն հայրենի հողին զօրութիւնը եւ ամէն տեղ զօրավիգ կանգնիլ Արցախի ժողովուրդի գոյապայքարին։
Դաւիթ Իշխանեան հարցազրոյց տուաւ յունական «Էֆիմէրիտա թոն սինտաքթոն» թերթի հայասէր թղթակից Նիքոլաս Զիրղանոսին, որ Արցախի քառօրեայ պատերազմին այցելած էր Արցախ եւ իր տպաւորութիւններն ու Արցախի ժողովուրդի արդար պայքարը նկարագրած էր երկարաշունչ յօդուածով մը։
Չորեքշաբթի՝ 6 Նոյեմբերին, Արցախի ազգային ժողովի պատգամաւոր Դաւիթ Իշխանեան այցելեց Ազգային Առաջնորդարան եւ հանդիպում ունեցաւ ՅունաՀայոց Թեմակալ Առաջնորդ Գեղամ Արք. Խաչերեանի եւ Ազգային Վարչութեան անդամներուն հետ։ Նոյն գիշեր, Դաւիթ Իշխանեան հանդիպեցաւ ՀՅԴ Յունաստանի Կեդր. Կոմիտէի կազմին հետ։ Ընկերը ներկայացուց Արցախի հիմնահարցի վերջին զարգացումները, խօսեցաւ Արցախի քաղաքական եւ ընկերային իրավիճակին մասին, յատկապէս՝ 2020-ի նախագահական եւ երեսփոխանական զոյգ ընտրութիւններու լոյսին տակ։ Անդրադարձ կատարեց Արցախի միջազգային ճանաչման համար եղած ջանքերուն եւ քաղաքական նախաձեռնութիւններուն, որոնք կը ծաւալին պետական մակարդակի վրայ, ինչպէս նաեւ աւելի մանրամասնեց վերջերս Արցախի պետութեան եւ ՀՅԴ-ի կազմակերպութ եամբ տեղի ունեցած Արցախի բարեկամներու խորհրդաժողովին մասին։
Արցախի Ազգային ժողովի պատգամաւոր Դաւիթ Իշխանեան այցելեց Ազգային առաջնորդարան
Ազգային առաջնորդարանի դիւանը կը հաղորդէ, որ Չորեքշաբթի, 6 Նոյեմբեր 2019-ի երեկոյեան, Յունաստանի Հայոց Թեմի Ազգային Առաջնորդարան այցելեց Արցախի Ազգային ժողովի պատգամաւոր եւ ՀՅԴԱրցախի Կեդրոնական Կոմիտէի ներկայացուցիչ Դաւիթ Իշխանեան, ընկերակցութեամբ ՀՅԴ Յունաստանի Կեդրոնական Կոմիտէի ներկայացուցիչ Սերգօ Գույումճեանի: Հիւրին ընդունեցին Յունաստանի Հայոց Թեմի Առաջնորդ Գեղամ Արք. Խաչերեան եւ Ազգային Վարչութեան անդամները: Պրն. Սերգօ Գույումճեան ներկայացուց Արցախեան շարժումի առաջին իսկ օրէն՝ թէ՛ ռազմական թէ՛ հասարակական-քաղաքական մարզէն ներս իր մասնակցութիւնը բերած պրն. Իշխանեանը: Առաջնորդ Սրբազան Հայրը, յանուն Ազգային Իշխանութեան, ուրախու թեամբ ողջունեց այս այցելութիւնը, նշելով որ արդէն անցնող տասնամեակներուն, Լիբանանի Թեմին Առաջնորդի հանգամանքով, ինք ծանօթ էր յարգելի հիւրին. այս առիթով, սրբազան հայրը անգամ մը եւս հաստատեց Հայ եկեղեցւոյ եւ ի մասնաւորի Մեծի Տանն Կիլիկիոյ Կաթողիկոսութեան ու իր թեմերուն ամբողջական զօրակցութիւնը Արցախին:
Ազգային Վարչութեան ատենապետ Պօղոս Չոլաքեան բարի գալուստի խօսքերով ողջունեց այցելութիւնը յարգելի հիւրին:
Դաւիթ Իշխանեան շնորհակալ ըլլալով եղած պատիւին ու ընդունելութեան համար, իր գոհունակութիւնը յայտնեց, որ Յունաստանի հայութեան մօտ կը գտնուի, յիշելով անցնող տարիներուն յունահայութեան բերած նպաստն ու մասնակցութիւնը Արցախեան պայքարին, ապա ընդհանուր կէտերու մէջ ան անդրադարձաւ Արցախի ներկայ իրավիճակին եւ դիմագրաւած հիմնահարցերուն: Իշխանեան կարեւորութեամբ անդրադարձաւ Մեծի Տանն Կիլիկիոյ Արամ Ա. Վեհափառ Հայրապետի դերակատարութեան, ի մասնաւորի՝ Արցախ կատարած յատկանշական այցելութեան: Ազգային Վարչութեան անդամներուն կողմէ եղած հարցումներուն, Իշխանեան տուաւ սպառիչ պատասխաններ: