«Էրմէնիհապեր».- Թրքական ընդդիմադիր «Cumhuriyet» թերթի լրագրող Մուսթաֆա Պիրօլ Գիւգեր իր սիւնակին մէջ անդրադարձած է Հայոց Ցեղասպանութեան հարցով Իրանին ունեցած պաշտօնական դիրքորոշումին:
Յօդուածի հեղինակը հետեւեալ շեշտադրումները ըրած է. «Իրան, որ կը հանդիսանայ Թուրքիոյ եւ Ատրպէյճանի կողմէն գրեթէ շրջափակման մէջ գտնուող Հայաստանի հիմնական առեւտրային գործընկերը, պաշտօնապէս չէ ընդունած Հայոց Ցեղասպանութիւնը: Պատճառը այն է, որ Իրան Թուրքիոյ հետ յարաբերութիւններու պահպանման անհրաժեշտութիւն կը տեսնէ: Բայց տարածաշրջանային շարք մը հարցերուն մէջ, օրինակ Լեռնային Ղարաբաղի հիմնախնդիրին մէջ Իրան անցած է Հայաստանի կողմը»:
Մուսթաֆա Պիրօլ Գիւգեր նաեւ դիտել տուած է, որ Իրանի բազմաթիւ ղեկավարներ, ինչպէս օրինակ Իրանի նախկին նախագահ Մոհամմէտ Խաթամին, ժամանակին այցելած է Երեւանի մէջ գտնուող Հայոց Ցեղասպանութեան զոհերու յուշահամալիր:
«Աւելին, 2010-ին Իրանի փոխնախագահ Համիտ Պաղայի Թուրքիան դատապարտած է ցեղասպանական գործողութիւններուն համար: Երկու երկիրներու միջեւ ճգնաժամի պատճառ դարձած էր», կը յիշեցնէ յօդուածին հեղինակը:
Հայոց Ցեղասպանութեան հարցը թուրք վերլուծաբանը կը ներկայացնէ ժխտողականութեամբ` զայն ընդամէնը հայկական շրջանակներու կողմէն կատարուող պնդում համարելով։