Կը քալեմ ծանօթ, բայց ինծի արդէն օտար դարձած թաղերէ: Շէնքերը շատո՜նց կորսնցուցած են իրենց կենսունակութիւնը, համն ու հոտը: Հատ ու կենտ լոյսեր կը պսպըղան շէնքերէն՝ ինչպէս հեռաւոր ու ամայացած գիւղի տուներ: Փողոցը բոլորը գլխիկոր ու մտածկոտ կը քալեն, կարծես կը վախնան դաժան իրականութեան հետ առերեսուելէ: Անդին՝ արաբ լակոտներ զիրար հայհոյելու մրցումի ելած են:
Կ’անցնիմ երբեմնի Նոր Գիւղէն, որ օրըստօրէ աւելի կը վերածուի ալ Միտանի…
***
Ֆէյսպուքը նորէն կը թարմացնէ յիշողութիւնս՝ 9 տարի առաջ այսօրուան պէս…, կը բանամ էջս… ինը տարի առաջ այսօրուան պէս վեցերորդ դասարանի հանդէսիս օրն էր…: Նոյն Նոր Գիւղի «Տիգրանեան» պարտէզէն ներս մօտաւորապէս 60 աշակերտներ կը վանկարկէին «Սահակեանէն՝ Ճեմարան», բայց այդ 60-էն միայն տասը հոգին աւարտեց Ճեմարանը…:
Այդ օր ոչ մէկուս միտքէն կ’անցնէր, որ վերջին անգամ պիտի տեսնէինք զիրար: Համոզուած էինք, որ մեր չարաճճիութիւնները պիտի շարունակէինք Ճեմարանի յարկին տակ, պիտի ծանօթանայինք նոր ընկերներու, պիտի մտերմանայինք անոնց հետ, սակայն երբեք պիտի չմոռնայինք զիրար…
***
-Կարեւոր ըսելիք ունիմ, առանց ընդմիջելու լսէ՛: Վերջնականօրէն պիտի մեկնինք: Տունն ալ ծախու դրած ենք: Կը կարծեմ որ ասիկա ամէնէն ճիշդ որոշումն է: Չէ՞ որ դուն ալ շատ կ’ուզես հոն հաստատուիլ եւ միշտ կը կրկնես Գ. Նժդեհին խօսքը «Հայրենիքից զատ, հայրենիքից դուրս ինձ համար խաբուսիկ են բոլոր դրախտները»: Գոնէ հոն մարդ կ’ունենաս հիմա եւ երբ որ այցելես հարազատ տանիք մը կ’ունենաս գըլխուդ վերեւ եւ յետոյ այնքա՜ն դիւրացած են հաղորդակցութեան միջոցները հիմա, երբ որ ուզենք կրնանք տեսնուիլ…: Հաւատա՛, հեռաւորութիւնը իր ազդեցութիւնը պիտի չունենայ… Դուն իմ միակ հաւատարիմ ընկերն ես, չունեցած քոյրիկս ես եւ ընդմիշտ պիտի մնաս… ես վստահ եմ, որ դուն ալ օր մը պիտի գաս…
***
Փիլոնները հագած, շրջանաւարտութեան գլխարկները մեր գըլխուն, շարուեցանք բեմին վրայ: Իւրաքանչիւրիս աչքերը այնպէ՜ս կը փայլէին, ամէն մէկս իր միտքին մէջ իր լուսաւոր ապագան կը հիւսէր: Իւրաքանչիւրս թէեւ տարբեր նպատակով, սակայն նոյնը կ’ուզէինք… յաջողութի՜ւն: Ու հնչեց մեր վերջին զանգը, գլխարկները թռան օդ եւ անոնց հետ երկինք բարձրացան նաեւ մեր երազները:
Արդէն պատրաստ էինք կեանքի ովկիանոսին մէջ նաւարկելու, բայց անտեղեակ էինք, որ ովկիանոսին ալիքները երբեմն շատ ուժգին կը հարուածեն եւ գիշատիչ ձուկեր կրնան մեզ լափել, նաեւ կրնանք հանդիպիլ մեծ ժայռերու: Չէինք գիտեր, որ ստիպուած էինք մեր խոշոր նաւէն փոխադրուիլ փոքր մակոյկներ եւ այդպէս նաւարկել:
***
Օրուան աւարտին երիտասարդութեան մեծամասնութիւնը, առանց սեռի խտրութեան, յոգնաբեկ կը մտնէ իր սենեակը, կը գոցէ դուռ ու պատուհան եւ իր հեռաձայնի գունաւոր պաստառիկէն կը նայի աշխարհին: Կը դիտէ իր տարեկիցներու «վայելք»ի տեսերիզներն ու նկարները ու կը մտմտայ՝ «Երանի՜ ես ալ հոն ըլլայի», յետոյ կը նայի ժամուն, կը յիշէ, որ վաղը առտու պէտք է գործի երթայ, որպէսզի գոնէ իր ծախսերը ընտանիքին վրայ բեռ չըլլան…
Վեհան Պարսումեան