(Գիրեճեան Նազարը՝ հօրս քեռին եւ իր շառաւիղները)
Վտանգաւորը հոն էր, ուր երբեմն կ’երթայինք բացօթեայ դաշտ, ներկայիս Ս. երրորդութիւն-Զուարթնոց եկեղեցւոյ ետեւի տարածքը: Խօսքը այն ժամանկահատուածին մասին է, ուր նոյնիսկ եկեղեցին գոյութիւն չունէր: Լծուելով հետախուզական աշխատանքի, աղբերուն մէջ կը փնտռէինք STP մակնիշով մետաղեայ դատարկ շիշեր, զորս հայ արհեստաւորները կ’օտագործէին ինքնաշարժներու իւղ լեցնելու համար: Այդ շիշերուն մէջ կը լեցնէինք քիմիական նիւթի մը մնացորդացը՝ գարպիտ, որ յետ գործածութեան մեր արհեստաւորներուն կողմէ, թափուած կ’ըլլար դաշտին մէջ: Այդ շիշերը իրենց նոր լիցքովը կը շպրտէինք մեր վառած խարոյկին մէջ, սպասելով անոնց շառաչիւն պայթիւնին: Այս ամէնը առանց հաշուի առնելու, որ կրնայ շիշը բեկորներու վերածուիլ եւ լուրջ վնասներ հասցնել չորս դին: Այս արարողութիւնը աւարտելէ ետք, ժամը կը հասնէր յագեցնելու փորին կանչը: Տունէն վերցուցած կ’ըլլայինք գետնախնձոր, սոխ եւ զանոնք թաղելով այդ բոցին մէջ, յոխորտաբար կը տօնախմբէինք մեր քաջագործութիւնը՝ համտեսելով խանծուած համեղ պատառիկները:
Զանազան խաղերու սահմանումին մէջ ինկած այս տիպի ժամանցները, խորքին մէջ, ինծի նման քաղաքի «կակուղ թաթիկ» տղուն համար, արկածախնդրութեան մը համազօր կարգավիճակ ունէին: Ճիշդ այդ պատճառով ալ Նոր Գիւղի ընկերներս՝ սկսնակի ակնոցով կ’արժեւորէին բերած մասնակցութիւնս, ուր յաճախ ներողամտութեամբ կը խնայուէին իմ «յանցանքները», մինչեւ որ վարժութեան (ըսթաժի) շրջանս անցնէի բարով, արժանանալով Նոր Գիւղի «թաղային չարաճճիութիւններու» վկայականին, որուն երբե՛ք արժանի չգտնուեցայ, չստանալով այդ «պատուոյ գիրը»:
Յիշատակելի է նաեւ, որ մեծ չափի հեծիք քշելը Նոր Գիւղի թաղերուն մէջ սորվեցայ, օգտուելով այն խանութներէն, որոնք վարձու հեծանիւ կը տրամադրէին փափաքողներուն: Այսպէս, մէկը Յաբէթն էր՝ ճիշդ Նոր Գիւղի մզկիթին դիմացը, որ աւելի կարգին եւ նոր հեծանիւ ունէր խանութի պահեստանոցին մէջ: Իսկ այլ մրցակից մը՝ Յարութը, որ ուստա Արտաշին կից խանութ մը ունէր: Ախորժակի բերելու համար երիտասարդները, ան խանութէն դուրս կը շարէր իր անորակ հեծանիւները, զանոնք ներկայացնելով որպէս կեռ ինծի նման սկըսնակներուն: Այդ աժան, կէս կեանք ունեցող հեծանիւներուն լեղի փորձութիւնը անձնապէս ճաշակած եմ: Օր մը հեծելարշաւի համար իրմէ վերցուցի հեծանիւ մը ու այնքա՜ն գուրգուրանքով մինչեւ քաղաքի մեր տուն քշեցի ու տան մառանը պահ դրի՝ ախորժակով պատրաստուելով յաջորդ օրուան՝ Քրիստափոր Պատանեկան Միութեան կրտսեր խումբերու արշաւին, դէպի Միւսլիւմիէի կայարանը, որ Հալէպէն շուրջ 15 քիլոմեթր հեռաւորութեան վրայ կը գտնուէր:
Այդ ճամբուն ծանօթ հալէպահայերը լաւ գիտեն, որ պաղեստինցիներու գաղթակայան մը կար այդ ուղիին վրայ, եւ հետիոտն կամ հեծանիւով այդ դիրքէն անցնիլը մեծ քաջագործութիւն էր, քանի որ պիտի դիմաւորուէիր շրջանի տղոց «տաք ընդունելութեամբ», արժանանալով տեղատարափ քարկոծումի, ճամբու վերեւի իրենց ապահով բարձր դիրքերէն: Նման լեղի փորձութեան վախը երկա՜ր ժամանակ մնաց մէջս, տրուած ըլլալով որ ճիշդ այդ դիրքին վրայ, վարպետ Յակոբէն վարձուած հեծանիւիս շղթան կոտրուեցաւ ու ես խմբակէն անջատուելով սպասեցի հրաշքի մը, որ ազատէ զիս այս անելէն: Երէց պատասխանատուները, որոնք մեզ կ’ընկերակցէին, նկատելով այս անհամ կացութիւնը, վերադարձան եւ արագ մը հեծանիւը քաշքշելով հեռացուցին այդ վայրէն, զիս եւ հեծանիւը տեղաւորելով անցնող ինքնաշարժի մը մէջ, որ կ’ուղղուէր դէպի Միւսլիւմիէի կայարան:
Այլ վտանգաւոր լուրջ բնոյթի բախտախնդրութիւն մը անցուցի այս անգամ Քուէյք գետին եզերքը, ուր Յարութին ընկերակցեցայ՝ իրենց տան ոչխարը արածելու, միեւնոյն ժամանակ գորտ որսալու պատեհութիւն մը ստեղծելու, որովհետեւ Յարութը համոզում գոյացուցած էր, որ գորտին արիւնը քսելով ափիդ մէջ, ափդ կը դառնայ աւելի դիմացկուն, տոկալով դպրոցի ուսուցիչներու գաւազանի հարուածներուն: Հայկական գերեզմաններու ճամբուն նայող կամուրջի շրջան ուղղուեցանք: Գետափին կից, նշմարեցի կռկռան անասուններէն պարարտ հատ մը: Ուշադիր, անշշուկ պատրաստեցի ձեռքիս մէջ բռնած ուրկանի նման լաթը, որ ձգեմ վրան: Կեդրոնացումս որսին վրայ էր, եւ երբե՛ք ուշադիր չէի այլ մանրամասնութիւններու: Յանկարծ, քայլերս քսուելով մամուռապատ թաւշեայ գետակի պէթոնէ սալայատակին, ջուրին մէջ ինկայ: Գետին հոսքը շատ արագ չէր, բայց շատ հանգիստ հասակս կը ծածկէր եւ կրնար արագ մը զիս կուլ տալ: Յարութը ինձմէ քայլ մը անդին էր եւ շատ արագ ու համարձակ հազիւ կրցաւ ձեռքը երկարել ու ջուրին հոսքէն դուրս քաշել սարսռացող մարմինս: Ճահճացած ջուրէն դուրս գալով, անորոշութեան տուայտանքս մասամբ մեղմացած էր, բայց գորտը անհետացած ու մենք շուարած հայեացքով լուռ զիրար կը զննէինք: Թրջուած ցնցոտիներով անմիջապէս հաւաքուեցանք եւ վերադարձանք Քեռի Նազարենց բնակարանը, պատրաստուելով տաք հարց ու փորձի: Սպասածէս շատ նուազ մտահոգութիւն ցուցաբերեցին տնեցիները: Չուշացաւ պարգեւատրումը Հռիփ քեռկինին ձեռքով, Գիրէճեաններուն համադամ նշանաւոր լոլիկի ջուրի տիւրիւմ-ը՝ յագեցուց սոված որովայնս:
Այս եւ նման ոդիսականներ Նոր Գիւղի մթնոլորտին համար տարօրինակ չէր: Ինծի նմաններուն համար, փերիներու հեքիաթային պատմութիւններու համազօր բաներ էին, այնքա՜ն ազդու ու յիշատակելի պատկերներ, որոնք իրենց մանրամասնութիւններով քանդակուած են պատանեկան ծծումբային յիշողութեանս մէջ:
Նոր Գիւղի ամէնէն յիշարժան վայրերէն էին Ժէզուիթներուն դպրոցն ու շրջափակը: Երբեմն հօրս հետ կ’այցելէինք այդ հիմնարկը, ուր ինք պաշտօնավարած էր քառասունականներու վերջը եւ շատ մտերիմ յարաբերութիւն մշակած գործող անձնակազմին հետ, մասնաւորաբար՝ հանգուցեալ պրն. Մկրտիչ Թաշճեանին: Այդ այցելութիւններուն ընթացքին, դպրոցին շրջափակը եւ մեծ դաշտը կը դառնար իմ նախանձելի «արօտավայրը»: Դպրոցին դիրքը շատ լաւ սորվեցայ, ինչ որ օգնեց տարբեր առիթներով ընկերովի երթալու եւ ՄՕՆ ԲԷՐ-ին ներկայացումը վայելելու, ըմբոշխնելով TIN TIN-ին ֆիլմերը, որոնց պատմութիւններուն ծանօթ էի ԹԱՆ ԹԱՆի յատուկ պատկերազարդ թերթերէն: Տարբեր էր կենդանի պատկերով եւ ՄՕՆ ԲԷՐ-ին մեկնաբանութիւններով հետեւիլ հերոսութիւններուն այն կերպարներուն, որոնց շարժումներուն կ’ընկերակցէր վարդապետին գաւազանի հարուածներուն ձայնը, երբ կը մեկնաբանէր ցուցադրուած պատկեր մը:
Յար եւ նման վայր մըն էր մեզ համար՝ Սինեմա Նազօն, որուն արհեստանոցը Շաբաթ -Կիրակի օրերը կը վերածուէր ցուցադրասրահի: Սերնդակից բոլոր տղաքը լաւ գիտեն անոր փոքր խանութը՝ Սահակեան վարժարանին դիմաց, ուր շատ յարմար գինով, ցած աթոռներու վրայ նստած, կրնայիր հետեւիլ ՔԱՈՒ ՊՈՅական ֆիլմի մը, որ քաղաքի սինեմաներուն մէջ շատ աւելի թանկ պիտի նստէր:
Գիշեր մը Նազար քեռիի ընտանիքին այցելութեան ժամը աւարտած էր: Պահն էր ուղղուելու տուն՝ քաղաքի հրշէջներու պողոտան: Սովորաբար, մինչեւ մզկիթ կը քալէինք, որպէսզի թաքսիի մը հանդիպէինք: Այդ օրերուն վարորդը անպայման հայորդի մը կ’ըլլար: Յանկարծ, մեր սպասումի վիճակը ընդհատեց կառավարական հանրային հանրակառք մը, որ կանգնեցաւ ճիշդ մեր կիցը, հակառակ որ մենք սպասումի կանգառի մը մօտը չէինք: Հանրակառքը դատարկ էր յաճախորդներէ եւ ներսը մութ: Յանկարծ բարձրաձայն հնչեց մեքենավարին ձայնը՝ «Եղբա՛յր Մանուէլ, հրամմեցէ՛ք, վեր բարձրացէ՛ք»: Մութին մէջ հազիւ կ’երեւար խօսողին դիմագիծը: Հայրս տատամսոտ պատասխանեց՝«Նեկրօ (Սարգիս Քէօշկարեան) դո՛ւն ե՞ս…»: Լաւ մը զննելէ ետք հանրակառքին ներսի բաժինը, հայրս մեզ թելադրեց վեր բարձրանալ: Պարզուեցաւ, որ Նեկրօն՝ իր հերթը աւարտած էր եւ պէտք էր հանրակառքը տանէր կայարան: Բայց ինչպէ՞ս կարելի է իր վարպետը գիշերուան մութին, փողոցին մէջտեղը ձգել իր բախտին ու անցնիլ-երթալ աննկատ: Նեկրոյին համար վարպետ էր հայրս, որովհետեւ այդ օրերուն, քաղաքի հանրային փոխադրամիջոցներու ընկերութիւնը եւ ելեկտրակայանը՝ միաձուլուած էին ու մէկ յարկի տակ կը գործէին, ուր հայրս կը պաշտօնավարէր՝ զբաղեցնելով տնօրէնի պաշտօն: Առաւել, ինչպէ՞ս կրնար հաշտուիլ այն մտածումին հետ, որ ինք պիտի չծառայէ ՀՄԸՄ-ի ֆութպոլի վարչական պատասխանատուին, եւ հանգիստ խղճով իր օդօպիւսով, գաղտագողի պիտի անցնի իր սիրելի երէց եղբօր մօտէն: Իր գործը վտանգելու աստիճան զոհողութիւն ընելը այդ սերունդին համար համոզում էր, աւելին՝ հաւատամք: Բնական է, հայրս զինք պախարակեց եւ զգուշացուց՝ «Նեկրօ՛, այս բաները պիտի չընես այլեւս…»: Այսպէս, ան մեզ հասցուց մինչեւ տան դրան առջեւ, ապա ուղղուեցաւ կայարան: Այդպէս Ճանչցուած էր Նեկրօն, իր յախուռն խառնուածքով, բայց պատուով ՀՄԸՄ-ի շապիկը կրող այս հայորդին կը մնայ իւրայատուկ ուսանելի տիպար մը այդ սերունդէն: Իր մասին կան նմանօրինակ վկայութիւններ, որոնք ոսկետառերով արձանագրուած են հեքիաթային Հալէպի վաղեմի օրերու յուշատետրերուն մէջ:
Ճակատագրի այլ դասաւորումով, ամուսնական կեանքի բոյնս հաստատեցի Նոր Գիւղ աւանին մէջ, այն միջնաբերդին, ուր չկային Ուստա Արտաշը, TIN TIN-ի ֆիլմը, Սինեմա Նազօն…: Այս փուլին՝ զաւակներս հասակ առին Սահակեանի, Ճեմարանի, Մարտիկեանի, Տիգրանեան սրահի, Կիլիկիա համալիր-ամրոցի շրջափակերուն ջերմութիւնը վայելելով ու մեր թաղեցիներուն եւ աննման դրացիներուն օրհնութիւնը առնելով: Այս ամէնը լիցք մըն էր, որ բաւարար էր իրենց հոգիներուն մէջ սերմանելու հայու նկարագիր, կենարար պատուաստ մը, որպէսզի արեւմուտքի կլանիչ ապազգային մթնոլորտին մէջ կարենային տոկալ եւ հայօրէն կենսագործել:
Ամէն անգամ, որ Հալէպ քաղաքի եւ Նոր Գիւղի շրջանի արժեհամակարգի իւրայատկութիւններուն մասին կը մտածեմ, տարօրինակօրէն մտքիս մէջ կը հնչէ աշուղ Ջիւանիի «Քանքարաւոր Ընկեր»ի մեղեդին ու անոր բառերու արձագանգը կ’ալկոծէ ներաշխարհս: Աշուղին բառերը, թէեւ համեցող իրականութեան, հալէպեան իրականութեան հարազատ, ամբողջական պատկերին թարգմանը կրնան չըլլալ, սակայն թելադրիչ հանգամանք մը կը յուշեն ու կը պարզեն մտայնութիւն մը, որ ոմանց մօտ գոյութիւն ունէր (ի դէպ՝ քանքարաւոր կը նշանակէ տաղանդաւոր):
Քանքարաւոր ընկեր, ինձ մի՛ նախանձիր,
Գոյութիւնս գաղափարիդ վնաս չէ:
Դու քաղաքացի ես, ես գեղականցի,
Իմ բանջարը քո հանճարին վնաս չէ, վնաս չէ:
Ես խսիր եմ գործում, դու ընտիր գորգեր,
Ինչո՞ւ ես նեղանում ինձնից, մա՛րդ ընկեր,
Ես եզներ եմ լծում, դու նժոյգ ձիեր,
Սայլապանս կառապանիդ վնաս չէ, վնաս չէ:
Քեզ սրտով յարգում է, պատւում Ջիւանին,
Դու միամիտ եղիր, գնա քո բանին,
Նա չի կարող հասնել այն աստիճանին,
Խեղճ բլուրս բարձր սարիդ վնաս չէ, վնաս չէ:
Վերջապէս Հալէպը եւ հալէպահայութիւնը կը համենան մնալ Նոր Գիւղի եւ քաղաքի միախառն, անզուգական բոյրը:
Հոս կանգ պիտի առնեմ եւ յատկապէս պիտի յիշատակեմ Գիրէճեան ընտանիքի շառաւիղներէն մեծ մօրս հօրեղբորորդիին՝ Սողոմոնի ոդիսականը:
Նախորդ յիշատակումներուս մէջ, երբ կ’անդրադառնայի խորթլախ լերան մեր հարազատներուն, Սողոմոնենց ընտանիքի յիշատակութիւնը ձգեցի այս էջերուն, որովհետեւ նկարագրելիքս սովորական ընտանեկան կեանքի պատում մը չէ, այլ Սողոմոն Գիրէճեանի ոդիսականը։ Սողոմոնը՝ արհեստով կօշկակար էր: Իրենց տունը՝ խորթլախ բնակող Հալլաճեաններուն տուն տանող ճամբուն վրայ էր: Ճիշդ կիցը տեղական ժողովրդային սրճարան մը կար: Այցելութիւններու մէկ բաժինն ալ հայրս կը յատկացնէր իրենց: Մարիամ քոյրիկը՝ Սողոմոնին կողակիցը, յաճախ տունը չէր ըլլար, որովհետեւ կ’աշխատէր իր ընտանիքին ապրուստը ապահովելու համար: Իսկ Ովսաննա Պաճըն՝ Սողոմոնին մայրը, տան դեռատի պզտիկները կը խնամէր, որովհետեւ Սողոմոնը այդ միջոցին բանտարկուած էր: Բանտարկուելուն պատճառը այն էր, որ խորթլախ տաղիին մէջ, զինեալ ընդհարումի մը ընթացքին, որպէս Դաշնակցական խումբի անդամ, ան փորձած էր պաշտպանել Օգնութեան Խաչի կեդրոնատեղին, որուն վրայ կրակ բացած էին հայանուն համայնավար մարդիկ: Ինքնապաշտպանութիւն ընող ընկերներէն մին կը կրակէ եւ կը զգետնէ յարձակողներէն մին, որ տեղւոյն վրայ կ’անշնչանայ: Կարճ ըսելով, Սողոմոն՝ հաշուի առնելով ընկերոջ ֆիզիքական ոչ խրախուսիչ վիճակը եւ ընտանեկան պարագաները, կ’որոշէ իր պատասխանատուութիւնը նկատել արարքի եղելութիւնը ու կամաւոր՝ քաշել անոր դառն հետեւանքները: Երկա՜ր տարիներ բանտարկուելէ ետք, կը մեղմացնեն պատիժը ու զինք ազատ կ’արձակեն: Մինչ այդ, դժբախտաբար վրայ տուած կ’ըլլայ իր առողջութիւնը: Այդ պատճառով ալ բանտէն ետք, երկար չի վայելեր ազատ կեանքը ու կ’աւանդէ իր հոգին:
Մահանալէն կարճ ժամանակ ետք, զաւակները՝ Արմէնը (հանգուցեալ), Պետիկը, Ովսանը, Ճոճօն (հանգուցեալ) եւ Վարդանը ընտանեօք կը փոխադրուին Լիբանան եւ հոն կը կազմեն իրենց սեփական, հայակերտ օճախները:
Մեծ մայրս՝ Ովսաննան, ունէր 3 քոյր՝ Մայրանուշը ամուսնացած էր Հիւսիւքիթ Մինաս Սիւքիւթեան-Լուռեանի հետ, Սիրանուշը ամուսնացած էր Յովնան Քրտօքեանին հետ, իսկ Մալաքին ամուրի էր եւ կը մնար Նազար Քեռիենց հետ:
Նազար քեռին շատ խոժոռ եւ շուքը ծանր անձնաւորութիւն մըն էր: Կ’աշխատէր զինուորական պետական Րահպէն, որպէս Մոթորսայքըլի արհեստաւոր: Կեանքի իր ամէնէն ցաւալի օրը եղաւ իր աւագ զաւակը կորսն-ցուցած օրը: Հանգուցեալ Ժանը իր զինուորական ծառայութեան ընթացքին, իր քշած մոթորսայքըլին արկածի մը զոհը եղած էր:
Քեռիին կողակիցը ինծի համար հերոսուհի Հռիփսիմէ քոյրիկն էր, որուն ուսերուն վրայ նաեւ կ’իյնար տան հոգատարութիւնը ու բազմանդամ ընտանիքին յաւելեալ եկամուտ ապահովելու խնդիրը: Այդքանը ոչինչ, բայց իբր գործ, ինչպէս շատեր մեր Նոր Գիւղի հայ ընտանիքներէն, պաշար կը պատրաստէին ու կը վաճառէին, ըլլայ լոլիկի խտացուած խոյս, կամ կարմիր պղպեղի փոշին եւ խտացուած խոյսը: Դժբախտաբար իրենց տունը բակ չունէր: Աստիճաններէն ուղղակի վերի սենեակները պիտի բարձրանայիր, հոնկէ վեր ալ դէպի տանիք: Հակառակ այս աննպաստ պայմաններուն, այդ կինը շուկայի ծանր պարկերը ուսին դրած մինչեւ տանիք կը բարձրանար: Օրերով կիզիչ արեւուն տակ կը պատրաստէր պաշարի յատուկ ուտեստեղէնը, իր բաժինով օգտակար դառնալու ընտանիքի բազում կարիքներուն:
Այս երեւոյթը աւելի կամ նուազ չափով համատարած էր Նոր Գիւղի ատենօք հայ ընտանիքներուն մէջ: Գաղթական հալէպահայը ընդհանրապէս եւ Նոր Գիւղցի հայը մասնաւորապէս զհացն յանապազօրեայ վաստկելու համար դիմեց արդար քրտինքով տքնաջան ճանապարհին ու այդ դժուարին պայմաններուն մէջ կենդանի պահեց նաե՛ւ հայեցի դաստիարակութիւնը, ուսում ջամբելով նորահաս սերունդներուն:
Այս պատճառներով ալ Նոր Գիւղը կը համենայ մնալ հայկականութիւն բուրող հնոց եւ աւանդապաշտ ամրոց:
(շար.2 եւ վերջ)
Ժան Հալլաճեան