ԵՐԿԱԹԷ ՇԵՐԵՓԻ ՊԱՏԳԱՄԸ ՆՈՅՆՔԱՆ ԱԶԴՈՒ ԿԸ ՀՆՉԷ ՈՐՔԱՆ ԱԼ ԹԱՒԱԼԻՆ ԺԱՄԱՆԱԿՆԵՐԸ :
Ուրբաթ 11-Նոյեմբեր-2022-ի երեկոյեան ժամը 8:00-ին ,Գէմպրիճի Հայ Կեդրոնէն ներս , տեղի ունեցաւ ժողովրդային հաւաք , մասնակցութեամբ հայ կեդրոնի յարկեն ներս գործող բոլոր միութիւններուն , նուիրուած՝ ԽՐԻՄԵԱՆ ՀԱՅՐԻԿԻ վախճանման 115-րդ ամեակի առթիւ :
Օրուայ հանդիսավար ընկհ. Ազիկ Գէորգեան հրաւիրեց ներկաները Հայաստանի Հանրապետութեան քայլերգով հանդիսութեան բացումը կատարելու , նաեւ ներկաները մէկ վայրկեան յոտնկայս յարգանքի տուրք մատուցեցին մեր բոլոր անմահ հերոսներու յիշատակին : Բեմ հրաւիրուեցաւ Համազգայինի «Տաթեւ» մասնաճիւղի ներկայացուցիչ , ընկ. Վիգէն Գէորգեան փոխանցելու օրուան բացման խօսքը հայ կեդրոնի բոլոր ուղեկից միութիւններու կողմէ , ան իր խօսքին մէջ յատկանշեց . « մեկնած Հայրիկի տիպարէն այսօր եւս մեր ժողովուրդի ներկայի ու ապագայի համար կարիքը ունինք պատասխանատուութեան բարձր գիտակցութեամբ եւ դաստիարակութեամբ օժտուած գործիչներ՝ աշխարհական թէ հոգեւորական » :
Բեմ բարձրացան խումբ մը «Մեսրոպ Թիթիզեան» Շաբաթօրեայ դպրոցի աշակերտներէն , որոնք խմբերգ կատարեցին « Հայեր միացէք , միացէք հայեր » Արցախի նուիրուած երգը : Ընթերցուեցաւ օրուայ Պատգամաբեր Գերաշնորհ՝ Տ. Վարուժան Ս. Արք. Հերկելեանի գործունէութեան կենսագրութիւնը Հանդիսավարին կողմէ : դարձեալ խումբ մը աշակերտներ յաջորդաբար ընթերցեցին պատառիկներ ԽՐԻՄԵԱՆԻ նշանաւոր խօսքերէն : Ապա հրաւիրուեցաւ օրուայ պատգամաբերը , ան լուսարձակի տակ առաւ խրիմեանի կեանքը , որպէս մեծ հայը , ուսուցիչը , կղերականը , յեղափոխականը ,Վասպուրականի Արծիւը եւ վերջապէս Հայոց փրկիչ ՀԱՅՐԻԿԸ :
Ս. Նշան եկեղեցւոյ դպիրներէն ընկ. Ռազմիկ Կարպուշեան ելոյթ ունեցաւ մեներգելով Խրիմեանի «Հայրիկ Հայրիկ » երգը : Տեղի ունեցաւ պարգեւատրում , յաջորդաբար պարգեւատրուէցան՝ օրուան պատգամաբեր հիւրաբար հրաւիրեալ Այնճարաբնակ Տ. Վարուժան Ս. Արք. Հերկելեան , շրջանիս «Արամ Դրօ» կոմիտէի ներկայացուցիչ ընկ. Բիէռ Մկրտիչեանի կողմէ : Մեծի Տանն Կիլիկիոյ Կաթողիկոսութեան ազգային ժողովի պատգամաւոր Տիար Կարօ Փոսդատճեան , Համազգայինի «Տաթեւ» մսնճղ.-ի ներկայացուցիչ ընկ. Վիգէն Գէորգեանի կողմէ : Գերաշնորհ՝ Տ. Բաբգէն Ս. Արք. Չարեան , Ս.Նշան եկեղեցւոյ հոգաբարձութեան ներկայացուցիչ Տիար Սեպուհ Կապաճուզեանի ձեռամբ :
Հանդիսութեան աւարտին թեմիս առաջնորդը փոխանցեց իր սրտի խօսքը եւ օրհնանքը , յարատեւ բեղուն գործունէութիւն մաղթելով Գէմպրիճի հայ կեդրոնի կառոյցին , ան ցանկութիւն յայտնեց , յուսալով թէ շուտով յաղթահարուի հայրենիքի ու յատկապէս հայ ժողովուրդի դէմ ծառացած այս դժուարին կացութիւնը : Հանդիսավարը հրաւիրեց ներկաները միասնաբար երգելու « Կիլիկիա» մաղթերգը , այսպիսով ձեռնակը հասաւ իր լռումին :
ՀԱՄԱԶԳԱՅԻՆԻ «ՏԱԹԵՒ» ՄԱՍՆԱՃԻՒՂ
14-ՆՈՅԵՄԲԵՐ-2020