Ստորեւ կը ներկայացնենք «Առաջնորդող» խորագիրի ներքեւ «Դրօշակի» առաջին համարին մէջ լոյս տեսած ակնարկը:
Հայ Յեղափոխական Դաշնակցութիւնը վերսկսում է «Դրօշակ» պաշտօնաթերթի հրատարակութիւնը: «Դրօշակ»ի կենսագրութիւնը ձուլուած է ծնող կուսակցութեան անցած ճանապարհին այնքան, որ այս երկուսից մէկին անդրադառնալիս յաճախ յիշում ես միւսին: Սխալուած չենք լինի պատկերաւոր ներկայացնելով, որ «Դրօշակ»ը եղել է կուսակցութեան մաքառումի ու հերոսացման ուղին արտացոլող հայելին: Ազատագրական պայքարի շրջանի «Դրօշակ» ի խունացած էջերից այսօր էլ զգացւում են պայքարի տաք շունչը, գողգոթայով անցնող ժողովրդի ապրումները, երրորդ հարիւրամեակում հայոց ճակատագրի դժուարութիւնները յաղթահարող հաւատաւորների մտքի ու սրտի ոգորումները: «Դրօշակ»ը եղել է գաղափարական այն հնոցը, որտեղ սաղմնաւորուել ու բիւրեղացել է ազգային-յեղափոխական-սոցիալական շարժման նպատակը, հիմնաւորուել է ազգային երազանքներ հետապնդող կուսակցութեան քաղաքական եւ մարտական գործունէութիւնը: Պատահական չէ, որ հայ ֆիտայիներն ու զինատարները զէնքի հետ «Էրկիր» էին հասցնում նաեւ «Դրօշակի» համարները:
«Դրօշակ» երեւոյթը մեզ համար բարոյական հսկայ ժառանգութիւն է եւ մարմնաւորում է իրեն կերտող բոլոր նուիրեալների` խոնարհումի արժանի վաստակը:
«Դրօշակ»ը ինքն իրեն վաղուց հաստատած ինքնութիւն է` խորհրդանշական եւ գործնական ուղերձներով:
Իր նորացող ընթացքի մէջ «Դրօշակ»ը մեզ համար համազգային հետաքրքրութեամբ համակուսակցական օրգան է, մտքի ու գաղափարների թրծման եւ զարգացման բեմ, հայ քաղաքական եւ հասարակական կեանքի ներքին ու արտաքին մարտահրաւէրների մասին բարձրաձայնող խօսափող:
Իր առաքելութիւնը յաջողելու համար «Դրօշակ»ը պէտք է ձգտի երկխօսութեան ազգային մտածողութիւն եւ մտահոգութիւն ունեցող բոլորի հետ, լինի անաչառ ու համարձակ:
«Դրօշակ»ի կողմնորոշիչն ազգային ու պետական շահն է, ազատ, բարեկեցիկ, անվտանգ, ֆիզիքական ու հոգեւոր միասնականութեամբ շաղկապուած հայութեան կամքը:
Խօսքի առատութեան մեր ժամանակներում «Դրօշակը» կրկին հրապարակ է իջնում որոշակի բաց տեղ զբաղեցնելու համար: Անկախ պետականութեան երեսնամեակի շեմին կանգնած մեր երկիրը նման է մի նաւի, որի ուղեւորները մշտապէս նախանձախնդիր են եղել նաւի ղեկի մօտ կանգնողների խնդրով՝ անտեսելով դէպի ուր նաւարկելու պարագան: Ճանապարհի եւ նպատակի անտեսման հանգամանքն էլ հիմնականում ձեւախեղել է նաւավարներ ընտրելու չափանիշը: Չաւարտուած պատերազմի, անցեալից ժառանգուած հիմնահարցերի եւ նոր ժամանակի բազմազան մարտահրաւէրների բեռն ուսած՝ մեզ համար թերեւս առաջնային պէտք է լինէր հին փարոսի նոր լուսարձակումների ներքոյ կրկին ու կրկին հարցնելն ու յստակեցնելը ինքներս մեզ համար, թէ ով ենք մենք, որտեղից ենք գալիս, ինչ միջավայրի հետ ենք փոխյարաբերւում, որն է մեր՝ որպէս հայութեան գոյութեան իմաստն այս արեւի տակ, եւ ինչ ենք պարտաւոր անել ապագայում մեր եւ մեր սերունդների արժանաւոր տեղն ապահովելու համար:
«Դրօշակ»ը, իր ջուրը խմելով սեփական ակունքներից եւ այլոց փորձառութիւնը նկատի ունենալով, կը ջանայ յստակեցնել խնդիրներն ու փնտռել դրանց պատասխանները:
Թերեւս առայժմ այսքանը, որպէսզի յաւակնութիւնները մեզանից առաջ չընկնեն: Թող որ մեր գործը խօսի մեր փոխարէն:
«Դրօշակ» պաշտօնաթերթ