Կիրակի, 20 Հոկտեմբեր 2019-ին, ՍԱՆԱ հաղորդեց, որ թրքական ուժերն ու անոնց պատկանող զինեալ ահաբեկչական խմբաւորումները սուրիական հիւսիսային հողերուն վրայ իրարայաջորդ յարձակումներ գործելէ ետք, Հասիչէի հիւսիսային շրջանի Ռաս ուլ Այն աւանը գրաւեցին:
Աղբիւրը աւելցուց, որ բռնագրաւումին հետեւանքով հարիւրաւոր բնակիչներ տեղահանուեցան եւ բազմաթիւ բնակարաններ քանդուեցան:
ՄԱԿ-ի տուեալներու համաձայն, թրքական «Եփրատի Աղբիւր» գործողութեան հետեւանքով ցարդ 180.000 քաղաքացի տեղահան եղած է Սուրիոյ հիւսիսային շրջաններէն:
Բրիտանական «Տէյլի Մէյլ» թերթը հրապարակած էր Սուրիոյ հիւսիսային շրջանին մէջ տեղի ունեցած դէպքերուն առնչուող սարսափազդու լուսանկարներ, որոնք ցոյց կու տային թրքական ուժերուն եւ անոնց ենթակայ զինեալ խմբաւորումներուն ի գործ դրած գլխատումներն ու այլ բարբարոսութիւնները: