ՀՀ Արտաքին Գործոց Նախարարութիւնը հրապարակած է հետեւեալ հաղորդագրութիւնը.”Հայաստանը ողջունում է ԱՄՆ Ներկայացուցիչների պալատի կողմից թիւ 296 բանաձեւի ընդունումը, որով հաստատուում է ԱՄՆ դիրքորոշումը Հայոց Ցեղասպանութեան վերաբերեալ։ Այս բանաձեւը կարեւորագոյն նշանակութիւն ունի, քանի որ հաստատակամ է պաշտօնական ճանաչման եւ յիշատակման միջոցով ոգեկոչելու Հայոց Ցեղասպանութիւնը, մերժելու ժխտողականութիւնը եւ խրախուսելու Օսմանեան Կայսրութեան կողմից 1915-1923թթ․ 1․5 միլիոն հայերի բնաջնջման վերաբերեալ կրթութեան եւ իրազեկուածութեան բարձրացումը՝ որպէս 20-րդ դարում իրականացուած ցեղասպանութեան յստակ օրինակ։
Այն ժամանակ Միացեալ Նահանգների ժողովուրդն ու ղեկավարութիւնը մեծ ջանքեր գործադրեցին հայերի նկատմամբ իրականացուած վայրագութիւններին արձագանգելու գործում՝ փրկելով եւ օգնութեան ձեռք մեկնելով Հայոց Ցեղասպանութիւնը վերապրածներին։ Այսօր Միացեալ Նահանգները տուն է ուժեղ ու կենսունակ հայ համայնքի՝ իրենց հայրենիքի հպարտ քաղաքացիների համար, ովքեր նշանակալի աւանդ են բերել ինչպէս ԱՄՆ-ի ձեռքբերումներին եւ բարեկեցութեան, այնպէս էլ մեր երկու ժողովուրդների միջեւ բարեկամութեանը։ Այս բանաձեւը յարգանքի տուրք է մատուցում Հայոց Ցեղասպանութեան զոհերի յիշատակին, ցուցադրում յարգանք նրանց արժանապատուութեան նկատմամբ եւ նշանաւորում Ցեղասպանութիւնը վերապրածների կորովը եւ կենսունակութիւնը: