Հայաստանի Հանրապետութեան նախագահ Արմէն Սարգսեան շնորհաւորական ուղերձ յղած է Մայրութեան եւ գեղեցկութեան տօնին առիթով:
«Սիրելի կանայք,
Այս տարի յատուկ ջերմութեամբ եւ սիրով եմ շնորհաւորում ձեզ Մայրութեան եւ գեղեցկութեան տօնի առթիւ:
Առանձնակի շնորհաւորանքներս, բարեմաղթանքի ու շնորհակալութեան խօսքերս բժիշկ եւ բուժաշխատող կանանց, որոնք միշտ եւ յատկապէս այս դժուարին օրերին զօր ու գիշեր, բժշկական օգնութեան հետ մէկտեղ հարազատի հոգատարութիւն ու խնամք են ցուցաբերում բուժհաստատութիւններում գտնուող հիւանդների հանդէպ:
Երախտագիտութիւնս նաեւ բոլոր այն կանանց` ոստիկան թէ զինուորական, փրկարար թէ ծառայող, ովքեր աշխատանքի, մասնագիտութեան բերումով եւ հոգու կանչով այս օրերին վտանգում են իրենց կեանքն ու առողջութիւնը բոլորիս համար, այն կանանց, ում ամուսիններն այս օրերին հիւանդանոցներից, ծառայութիւնից ու աշխատավայրից գրեթէ տուն չեն գալիս` իրենց պարտքը կատարելով:
Կինը եւ յատկապէս հայ կինը մշտապէս եղել է ընտանիքի սիւնն` իր վրայ վերցնելով առաւելագոյն ծանրութիւնը, հոգսերն ու դժուարութիւնները: Հիմա, երբ իրավիճակից ելնելով, շատերը ստիպուած են առաւելապէս տանը մնալ, կնոջ հոգսն ու ծանրաբեռնուածութիւնն աւելի են մեծացել` պայմանաւորուած նաեւ առօրեայ ընտանեկան կեանքի կազմակերպմամբ, երեխաների եւ թոռների հեռավար կրթութեամբ, տնտեսական խնդիրներով եւ այլն: Սակայն հայ կինը երբեք չի ընկճուել ու միշտ կարողացել է ամուր մնալ, հաւատալով, որ ցանկացած դժուարութիւն անցօղիկ է:
Սիրելիներս,
Գարունը միշտ սպասումներով ու յոյսերով է լի: Այս տարուայ տօնական շնորհաւորանքների մէջ միգուցէ արտաքին փայլն ու ձեւը մի փոքր աւելի զուսպ են: Սակայն հաւատացէք, որ մեր սէրն ու երախտագիտութիւնը ձեր հանդէպ երբեք չեն փոխւում` երբ հայրը յուզւում է փոքրիկ դստեր ճռուողիւնից, երբ երիտասարդի սիրտը թրթռում է սիրելիի ժպիտից, երբ, անկախ տարիքից, կարօտում ենք մեր մօրն ու կնոջը, եւ մեր թոռան մէջ տեսնում նրանց շարունակութիւնը:
Որովհետեւ, սիրելի կանայք, կեանքը սկսւում է ձեզնից եւ շարունակւում է ձեզնով:
Պահպանէք ձեզ, եղէք առողջ, եղէք երջանիկ, ապրեցէք երկար»: