Հայաստանի հաւաքականի եւ «Ռոմա»ի կիսապաշտպան Հենրիկ Մխիթարեան միացաւ  հռոմէական ակումբի «Միասին» ծրագիրին, որուն միջոցաւ խումբը օժանդակութիւն կը ցուցաբերէ պսակաձեւ ժահրի  համաճարակին պատճառով սնունդի կամ բժշկական պարագաներու կարիք ունեցող 60-է վեր  տարիքի մարդոց, որոնք ունին ակումբի խաղերու տոմսերու տարեկան անդամագրութիւն:

«Ռոմա»ի կազմակերպած ծրագիրը գործի անցած է 2 Ապրիլէն սկսեալ։ Իտալիոյ մէջ կը գործէ յատուկ հեռաձայնի թիւ, որուն  միջոցով նշուած խումբի մարդիկ կրնան կապ հաստատել ակումբին հետ:  «Ռոմա»ի  նման ծրագիր մը կազմակերպելու գաղափարը ծնունդ առաւ, երբ յայտնի դարձաւ, որ Իտալիոյ տարեցները կը վախնան այս  համաճարակին պատճառով դուրս գալ տունէն՝ սնունդ եւ այլ պարագաներ ձեռք բերելու համար:

Ֆրանսայի Փարիզ Սան Ժերմանի ղեկավարները բանակցութեան գիծ հաստատած են Սպանիոյ ախոյեան Պարսելոնայի պատասխանատու կազմին հետ, առաջարկելով անոնց վաճառել պրազիլցի Նէյմարը փոխան Քրիզմանին: Sport-ը գրեց, թէ ֆրանսական ակումբի ղեկավարութիւնը մտադիր է ամրան փոխադրաշրջանին վաճառել Նեյմարը: Վերջին շրջանին շրջանառութեան մէջ կը դրուէին տեղեկութիւններ, ըստ որոնց, Պարսելոնայի վարչակազմը խոստացած էր Նէյմարը վերադարձնել քաթալոնէական ակումբ։ Այս աշխատանքով ան նուազեցուց պրազիլցի խաղացողին Ռէալ Մատրիտ միանալու կարելիութիւնը: Յիշենք, որ Նէյմար միացաւ ֆրանսական ակումբին 2017 թուականին:

Կիրակի օր անգլիական մամուլը յայտարարեց, որ Չելսի փափաք յայտնած է խումբին միացնել Պարսելոնայի յարձակողական խաղացող Քոթինիոն, որ այժմ մէկ տարուան վարձավճառով մաս կը կազմէ Գերմանիոյ ախոյեան Պայէրն Միւնեխին: Նոյն խաղացողով հետաքրքրուած են նաեւ անգլիական երեք ակումբներ՝ Մանչեսթըր Իւնայթըտը, Թոթենհամը եւ Լէսթըր Սիթին: Աւելցնենք, որ Քոթինիոն 2018 թուականին Լիվըրփուլէն տեղափոխուեցաւ Պարսելոնա՝ փոխան 145 միլիոն եւրոյի, բայց ան չկրցաւ ինքզինք արդարացնել սպանական ակումբին մէջ, եւ մէկ տարուան վարձավճառով փոխադրուեցաւ Գերմանիա:

Գերմանիոյ բազմակի ախոյեան Պայերն Միւնեխ անցեալ շաբթուան աւարտին երկարաձգեց խումբի մարզիչ Հանս Ֆիլկի պայմանագրութիւնը: Ֆիլկի նոր պայմանագրութիւնը նախատեսուած է մինչեւ 2023 տարեշրջանի աւարտը: Աւելցնենք, որ Հանս Ֆիլկ գերմանական խումբին մէջ իր պաշտօնը ստանձնեց 2019-ի սկիզբը,  փոխարինելով Նիկօ Կովաչին։ Ան մինչ այդ Ֆիլկ Կովաչիոյի օգնականն էր:

Անգլիոյ ֆութպոլի ներկայ ախոյեան Մանչեսթըր Սիթին Անգլիոյ  առողջապահութեան ազգային ծառայութեան  առաջարկած է պսակաձեւ ժահրի համաճարակին դէմ  պայքարելու համար  «Էթիհատ» մարզադաշտը օգտագործել որպէս բժշկական աշխատակիցներու վերապատրաստման կենդրոն: Ըստ Daily Mail-ի, յառաջիկայ օրերուն  յատուկ հրաւիրուած բժիշկներն ու բուժքոյրերը տարբեր բուժհաստատութիւններու աշխատակիցներու համար պիտի մասնակցին դասընթացքներու, որովհետեւ  երկրին կառավարութիւնը կը  պատրաստուի  զօրացնել պսակաձեւ ժահրի համաճարակին դէմ  պայքարի միջոցները: Մարզադաշտին մէջ նախատեսուած չէ ընդունիլ հիւանդներ, առ այժմ պիտի բաւարարուին միայն դասընթացքի աշխատանքներով:   Քաղաքի իշխանութիւնները արդէն սկսած են պատրաստել սենեակներ, դաշտին մէջ այդ դասընթացքները իրագործելու համար: