ՏԵՂԱԿԱՆ

 

– Սուրիոյ Մարզական Գերագոյն Կոմիտէի նախագահ Ֆիրաս Մուալլա պաշտօնական այցելութեամբ ժամանեց Հալէպ, ուր հանդիպումներ ունեցաւ քաղաքի մարզական պատասխանատուներու եւ ակումբներու վարչակազմերուն հետ: Մուալլա այցելեց Համտանիէի մարզահամալիրը եւ մարզական ակումբները: Կոմիտէի նախագահը այցելեց նաեւ ՀՄԸՄ-ի պարտէզ, ուր մօտէն ծանօթացաւ ակումբի կալուածին, նաեւ ծանօթացաւ անոր դիմագրաւած դժուարութիւններուն: Ան խոստացաւ նեցուկ կանգնիլ ՀՄԸՄ-ին՝ յաղթահարելու համար բոլոր դժուարութիւնները: Մուալլա այցելեց նաեւ ՀԵԸ-ի կեդրոն եւ հանդիպում մը ունեցաւ վարչութեան հետ:

– Սուրիոյ Ֆութպոլի Դաշնութեան նախագահ Հաթէմ ալ Ղայեպ եւ դաշնութեան անդամները Կիրակի օր Հալէպ ժամանեցին եւ Համտանիէի մարզահամալիրին մէջ իրենց հերթական նիստը գումարեցին: Դաշնութեան անդամները հանդիպումներ ունեցան հալէպի ֆութպոլի պատասխանատու մարմիններուն հետ:

– ՀՄԸՄ-ի Հալէպ Մասնաճիւղի Վարչութեան հովանաւորութեամբ, սկիզբ պիտի առնեն ՀՄԸՄ-ի պասքեթի, Ճատրակի եւ ֆութպոլի ամառնային դպրոցները: Վարչութիւնը յատուկ յայտարարութիւններով հրաւիրեց բոլոր քոյրերն ու եղբայրները անդամակցելու միութեան ամառնային դպրոցներուն:

Իտալիոյ Ռոմա ակումբը ընթացիկ մրցաշրջանին նիւթական հսկայ վնասներ կրեց: Ըստ իտալական  Football Italia-ին, Ռոմայի նիւթական կորուստները հասան շուրջ  126,4 միլիոն եւրոյի: Համեմատաբար նախորդ տարեշրջանին, այս տարի Ռոման արձանագրեց 100 միլիոնէ աւելի նիւթական վնաս: Մայրաքաղաքի  ելեւմուտքի անբաւարար վիճակը կապուած է պսակաձեւ ժահրի համաճարակին հետ: Ակումբը  այժմ ընդհանուր առմամբ  ունի 278,5 միլիոն         եւրոյի պարտք: Աւելցնենք, որ վերջերս Իտալիոյ Ֆութպոլի Դաշնութիւնը որոշեց մրցաշրջանը վերսկսիլ 20 Յունիսին: Իտալիոյ կառավարութիւնը ֆութպոլի  ակումբներուն թելադրեց վերսկսիլ խմբային մարզումները:  Պսակաձեւ ժահրին հետեւանքով, ինչպէս բոլոր երկիրները, Իտալիան ալ դադրած համարեց երկրին մրցաշրջանը՝ մինչեւ ցնոր տնօրինում:

Իտալիոյ «Թօթօ Սփորթ» օրաթերթը Կիրակի օր մարզական իր լուրերուն մէջ հաղորդեց, որ Ֆրանսայի Փարիզ Սան Ժերման ակումբի յարձակողական խաղացող Էտինսըն Քաւանիի մայրաքաղաքի խումբին հետ  ստորագրած պայմանագրութեան ժամկէտը կ’աւարտի: Ըստ յայտարարուած տեղեկութիւններուն, ուրուկուէյցի խաղացողը բանակցութիւններ սկսած է վարել Սպանիոյ մայրաքաղաքի Աթլեթիքօ Մատրիտ խումբին հետ, եւ մեծ հաւանականութեամբ յառաջիկայ տարեշրջանին պիտի կրէ Աթլեթիքոյի տարազը: 33-ամեայ խաղացողը, որ երկար ժամանակէ ի վեր մաս կը կազմէ ֆրանսական խումբին,  կ’ուզէ նոր  խումբի մը հետ շարունակել իր մարզական կեանքը, տարբեր երկիրի մը մէջ: Ան նախապէս խաղացած է իտալական Փալմիրօ եւ Նափոլի խումբերուն հետ: Ըստ լուրերուն, Քաւանի Աթլեթիքոյի խումբէն տարեկան պիտի ստանայ 7 միլիոն եւրօ:

Սպանիոյ Պարսելոնա ակումբի յարձակողական խաղացող Լուիս Սուարեզ կազմին հետ  վերսկսաւ իր փորձերը: Ան աստիճանաբար  կը պատրաստուի վերադառնալու մրցումներու դաշտ: Հինգ ամիս առաջ Սուարեզ  ծանրապէս վնասուեցաւ, որուն հետեւանքով ան հեռացաւ դաշտերէն եւ ենթարկուեցաւ վիրաբուժութեան: Բժիշկներու արտօնութիւնը ստանալէ ետք, ան փուլային դրութեամբ կատարեց իր փորձերը եւ այժմ ապաքինած է եւ պատրաստ  մրցումներու մասնակցելու: Սուարեզ օգտուեցաւ պսակաձեւ ժահրի համաճարակին դադարէն: