Սոյն թուականի 1 եւ 2 Յուլիսին տեղի ունեցաւ ԸԵՄՄ-ի (Ընկերվարական Երիտասարդների Միջազգային Միութեան Սեւծովեան տարածաշրջանի յանձնախումբի տարեկան ժողովը:
Համաճարակի պատճառով ժողովը տեղի ունեցաւ առցանց: ՀՅԴ Երիտասարդականի անունով ժողովին կը մասնակցէր Սարինէ Աբրահամեան:
ժողովին կը մասնակցէին ներկայացուցիչներ` Պելառուսէն, Պուլկարիայէն, Վրաստանէն եւ Ուքրանիայէն: Քննարկումի հիմնական նիւթն էր` թագաժահրի պարտադրած պայմանները եւ անոր հետեւանքներուն դէմ պայքարը:
Ժողովի առաջին օրուան օրակարգին մասնակից երկիրներու ներկայացուցիչներու զեկոյցներն էին` վերոյիշեալ երկիրներուն մէջ տիրող առողջապահական եւ տնտեսական վիճակներու մասին: Ներկայացուցիչները ներկայացուցին իրենց երկիրներու կառավարութիւններուն կատարած աշխատանքը` համաճարակի հետեւանքներուն վերացման ուղղուած: Խօսուեցաւ ոչ միայն կառավարութիւններուն իրականացուցած գործողութիւններուն մասին, այլ նաեւ իւրաքանչիւր կազմակերպութեան աշխատանքներուն եւ կամաւորական նախաձեռնութիւններուն մասին, որոնք յատկապէս հասարակութիւններու խոցելի խումբերու պաշտպանութեան ուղղուած են:
ՀՅԴ երիտասարդականի ներկայացուցիչը յայտնեց, որ Հայաստանի ՀՅԴ Երիտասարդական Միութիւնը նախաձեռնած է «Օգնէ Հայրենակցիդ» ծրագիրը, որուն ներգրաւուած է ՀՅԴ երիտասարդականի ողջ համաշխարհային կառոյցը: Ծրագիրի նպատակն է սննդամթերքով օգնել Հայաստանի կարիքաւոր ընտանիքներուն, որոնք առանձնայատուկ ծանր վիճակի մէջ յայտնուած են` յատկապէս համավարակի պատճառով:
Երկրորդ օրուան օրակարգը նուիրուած էր համավարակին դէմ պայքարի մէջ արդիւնաւէտ միջոցներու կիրառումին` ինչպէս առանձին պետութեան, նոյնպէս տարածաշրջանային առումով:
Մէկ այլ կէտով քննարկումը ընթացաւ տարածաշրջանի մէջ առկայ հակամարտութիւններուն շուրջ: Ժողովը հանդէս եկաւ յայտարարութեամբ, որ կարելի է հետեւեալ յղումով վերբեռնել:
ՀՅԴ Երիտասարդականի ջանքերով յայտարարութեան մէջ նշուեցաւ, որ Ատրպէյճանի ռազմատենչ քաղաքականութիւնը ընդդէմ Արցախի ժողովրդի ազատագրական պայքարին դատապարտելի է: Յայտարարութեան մէջ յիշուած է, որ հակառակ ՄԱԿ-ի Անվտանգութեան Խորհորդի 1 Յուլիսի բանաձեւի, համաշխարհային հրադադարի մասին, Ատրպէյճանը Արցախի եւ Հայաստանի Հանրապետութիւններու սահմանին սադրիչ զինավարժութիւններ կազմակերպած է: