«Արմէնփրէս».- Հայաստանի Հանրապետութեան նախագահ Արմէն Սարգսեան յայտարարութիւն հրապարակած է` յայտնելով, որ նախաձեռնած է քաղաքական խորհրդակցութիւններու` համազգային շահերու պաշտպանութեան մեր օրակարգէն բխող լուծումները ամենակարճ ժամկէտներով համաձայնեցնելու նպատակով:
ՀՀ նախագահի յայտարարութիւնը.
«Մամուլից տեղեկացայ, որ Ռուսիոյ եւ Ատրպէյճանի նախագահների հետ ստորագրուել է ղարաբաղեան պատերազմը դադարեցնելու մասին յայտարարութիւն: Մամուլից տեղեկացել եմ նաեւ պատերազմի դադարեցման պայմանների մասին:
Որպէս Հանրապետութեան նախագահ այս փաստաթղթի վերաբերեալ ինձ հետ որեւէ խորհրդակցութիւն կամ քննարկում, ցաւօք, չի եղել, որեւէ բանակցութեան չեմ մասնակցել:
Ղարաբաղեան հակամարտութեան կարգաւորումը համազգային նշանակութեան եւ կարեւորութեան հարց է: Հայաստանի, Արցախի, ողջ հայ ժողովրդի կենսական անվտանգային շահերին եւ իրաւունքներին առնչուող ցանկացած քայլ, գործողութիւն, ցանկացած որոշման ընդունում, առաւել եւս որեւէ փաստաթղթի ստորագրում պէտք է լինի համապարփակ խորհրդակցութիւնների եւ քննարկումների առարկայ:
Ընդգծում եմ, որ Արցախի, հետեւաբար` հայ ժողովրդի ճակատագիրը կարող է լուծուել միմիայն հաշուի առնելով մեր համազգային շահերն ու միմիայն համազգային կ’ոնսենսուսի հիման վրայ:
Հաշուի առնելով առկայ իրավիճակով պայմանաւորուած` ժողովրդի ստուար զանգուածի խոր մտահոգութիւններն, անյապաղ նախաձեռնում եմ քաղաքական խորհրդակցութիւններ` համազգային շահերի պաշտպանութեան մեր օրակարգից բխող լուծումներն ամենակարճ ժամկէտներում համաձայնեցնելու նպատակով:
Որպէս Հանրապետութեան նախագահ, ազգապահպանութեան կարեւորագոյն այս պահին համազգային միասնութեան ձեւաւորումը համարում եմ իմ այժմէական առաքելութիւնը: Յոյսով եմ, որ տասնօրեայ ժամկէտում բոլորիս կը յաջողուի ձեւաւորել այդպիսի միասնութիւն, որի պարագայում ես կը համարեմ, որ օգտագործել եմ հայրենիքիս ծառայելու հնարաւորութիւնները»:
