«Ապառաժ».- Հայ Յեղափոխական Դաշնակցութեան Արցախի Կեդրոնական Կոմիտէն, «Արցախի Արդարութիւն» կուսակցութիւնը եւ Արցախի ժողովրդավարակա» կուսակցութիւնը 23 Փետրուարին հրապարակեցին Երեւանի մէջ ցուցարարներուն նկատմամբ գործադրուած բռնութիւններուն առնչութեամբ հետեւեալ կոչը.
«Դատապարտում ենք այսօր Հայաստանի իշխանութիւնների կողմից տասնեակ քաղաքացիների, այդ թւում նաեւ «Հայրենիքի փրկութեան շարժման» համակարգող Իշխան Սաղաթէլեանի հանդէպ բռնի ուժի կիրառմամբ հաշուեյարդար տեսնելու դէպքերը եւ, ըստ այդմ, օրէցօր թափ առնող ժողովրդական շարժումը բիրտ ուժի միջոցով ճնշելու փորձերը:
«Այդօրինակ բռնութիւնները ՀՀ իշխանութիւնների կողմից ուղղուած են սեփական ժողովրդին զրկելու իր սահմանադրական իրաւունքների իրացման հնարաւորութիւնից:
«Նոյեմբերի 10ի խայտառակ փաստաթղթի ստորագրումից յետոյ, բացարձակապէս կտրուած լինելով իրականութիւնից, Նիկոլ Փաշինեանը շարունակում է իր ձախողումների մեղքը բարդել նախկին իշխանութիւնների, բանակի ու ժողովրդի վրայ` զուգահեռաբար տարածելով քաղաքացիական բախումներ հրահրող յայտարարութիւններ:
«Չնայած Արցախում ստեղծուած ծանր քաղաքական, ընկերային-տնտեսական եւ անվտանգային իրավիճակին, մեզ առաւել մտահոգում է ՀՀ գործող իշխանութիւնների մեղքով ստեղծուած կացութիւնը: Համայն հայութեան յոյսի կեդրոն Հայաստանի Հանրապետութիւնը վտանգուած է:
Մայր Հայաստանում ժողովուրդը կրկին ոտքի է ելել յանուն Արցախի, յանուն հայոց պետականութեան, յանուն արժանապատիւ ապագայի: Եւ այդ ապագայի համար պայքարը միասնական ճակատով հայութեան բոլոր հատուածների սրբազան պարտքն է:
Հայ Յեղափոխական Դաշնակցութեան
Արցախի Կեդրոնական կոմիտէ
Արցախի Արդարութիւն կուսակցութիւն
Արցախի Ժողովրդավարական կուսակցութիւն
23 Փետրուարի 2021թ.
ք. Ստեփանակերտ»