Ու այսպէս.-

Փաստ 1.

Երկուշաբթի, 8 Մարտին հայատեաց ու հայաստանատեաց Ալիեւը յայտարարեց, թէ Զանգեզուրը ատրպէյճանական պատմական հող է, ուստի այդտեղից էլ անցնելու է հաղորդակցական ուղին՝ կապելով միմեանց Ատրպէյճանը, Նախիջեւանն ու Թուրքիան (աւելի քան հարիւրամեայ երազի՝ փանթուրանիզմի միջանցքը):

Փաստ 2.

Նոյն օրը Թուրքիայի նախագահը նոյնպէս վերյիշեց Հայաստանում «կեներալների ռազմական յեղաշրջման անթոյլատրելիութեան» մասին, միաժամանակ ընդգծելով «ժողովրդի կողմից ձեւաւորուած իշխանութիւնների կայունութեան անհրաժեշտութեան հանգամանքը՝ ժողովրդավարական հիմունքներով», միաժամանակ յորդորելով հայերին՝ դասեր առնել ղարաբաղեան պատերազմից… (պատկերացրէք, այս խօսքերի հեղինակը այն նախագահն է, որի երկրի բանտերում ներկայումս 100.000-աւոր բռնադատուած քաղբանտարկեալներ կան, 2016-ին իրենց կողմից իսկ բեմադրուած ռազմական յեղաշրջման հետեւանքով):

Փաստ 3.

Ս. թ. Մարտ 3-ին Գորիսի փոխքաղաքապետ Եոլեանը յայտարարեց, որ նոյն օրից սկսեալ ատրպէյճանցիք Որոտանից մինչեւ Շուռնուխ յատուկ երկրաչափական աշխատանքներ են սկըսել յարակից գիւղամէջերում խրամատներ փորելով (շատ փորձագէտների կարծիքով՝ պատերազմական իրավիճակը, յատկապէս Սիւնիքի հայաթափման նպատակով, իրատեսական է, եթէ Հայաստանի իշխանութիւնները շարունակեն ընթացող կրաւորական-անտարբեր կեցուածքը):

Փաստ 4.

Նոյն օրը Հայաստանի իշխանութեան խորհրդարանի պատգամաւոր, ԱԺ պաշտպանութեան եւ անվտանգութեան հարցերի յանձնաժողովի նախագահ Անդրանիկ Քոչարեանը Եռաբլուրում «ի յարգանս» սպարապետ Վազգէն Սարգսեանի ծննդեան օրուայ յիշատակի, լրագրողներին ասաց, որ եթէ մենք մեզ հանգիստ ու խելօք չպահենք, «վստահեցնում եմ, որ նոյնիսկ Երեւանի գոյութիւնն է վտանգուելու…», իսկ թէ ո՞ւմ կողմից, պարզ է՝ թուրք-ատրպէյճանական դաշինքի, որոնց հետ ի դէպ՝ նոյն Ա. Քոչարեանը առեւտրատնտեսական ու դիւանագիտական յարաբերութիւնների ջատագովն էր՝ ընդամէնը օրեր անց Նոյ. 9-ի խայտառակ անձնատուութիւնից յետոյ…:

* * *

Շատ պարզ հաշուարկով ու լոկ վերոգրեալ 4 փաստերի միջեւ տրամաբանական առնչութիւնը դիտարկելով՝ ակնբախ է դառնում, թէ առհասարակ ինչո՞ւ 2018-ին ՀՀ-ում պատահեց «թաւշեայ յեղափոխութիւն» ու դրանից բխող 2.5-ամեայ ողջ ձախորդ իրադարձութիւնները, որոնց շարունակուելու դէպքում էլ իրականութիւն է դառնալու հայութեան սրբութեան սրբոց՝ Հայրենիք-Պետականութեան կործանումը…: