14 Մայիս 2021-ին «Հայաստան» դաշինքին քաղաքական խորհուրդը յայտարարութիւն հրապարակեց Հայաստանի մէջ Ատրպէյճանի ծաւալած զաւթողական արարքներուն առնչութեամբ.

«Յարգելի՛ հայրենակիցներ,

Ատրպէյճանը, օգտուելով Հայաստանի Հանրապետութեան իշխանութիւնների այսպէս կոչուած` խաղաղասիրական քաղաքականութիւնից, յանցաւոր անգործութիւնից, ամենաթողութիւնից, խախտել է մեր երկրի տարածքային ամբողջականութիւնը: Ատրպէյճանի զաւթողական ախորժակը բացուել է բացառապէս Նիկոլ Փաշինեանի գլխաւորած վարչախմբի հակահայկական քաղաքականութեան պատճառով:

Սիւնիքի ու Գեղարքունիքի մարզերում ատրպէյճանական զինուորականների ներխուժման արդիւնքում մեզ համար անվտանգային լրջագոյն սպառնալիքներ են առաջացել: Իրավիճակը յղի է ռազմական լայնամասշտապ բախման վտանգով` նոր պատերազմով եւ տարածաշրջանային անկայունութեան պոտենցիալով («կարողականութեամբ»(Գ.)): ՀՀ զինուած ուժերը պարտաւոր են ապահովել մեր սահմանների պաշտպանութիւնը:

Օրուայ իշխանութիւնները հերթական անգամ ցոյց տուեցին, որ անկարող են ապահովել մեր երկրի ու քաղաքացիների անվտանգութիւնը, երաշխաւորել ՀՀ տարածքային ամբողջականութիւնը: Չեն իրականացւում իրավիճակից բխող գործողութիւններ Ատրպէյճանի կողմից միջազգային իրաւունքի կոպտագոյն ոտնահարման փաստի կապակցութեամբ եւ մեր սահմանների պաշտպանութեան համար:

ՀՀ քաղաքացիներին կոչ ենք անում լինել զգօն ու համախմբուած, խուճապի չմատնուել եւ պատրաստ լինել զարգացումների ցանկացած սցենարի:

Յարգելի՛ հայրենակիցներ,

Համոզուած ենք, որ պարտութեան ու խայտառակութեան խորհրդանիշ այս ապաշնորհ իշխանութեան առկայութեամբ մեր երկրում հնարաւոր չէ հաստատել արժանապատիւ խաղաղութիւն, կայունութիւն եւ բարեկեցութիւն: Ուստի Հայաստանի ու Արցախի անվտանգութեան ապահովման թիւ մէկ նախապայման ենք համարում ազգային ու նոր որակի իշխանութեան ձեւաւորումը»: