Անցնող շաբաթ, Բերիոյ Հայոց Թեմի Ընկերային Ծառայութեան Խորհուրդի պատուիրակութիւնը շնորհաւորական այցելութիւն տուաւ Հալէպի երեք հիւանդանոցներու նորանշանակ տնօրէններուն: Պատուիրակութեան մաս կը կազմէին Ազգ. Առաջնորդարանի դիւանապետ տիար Քրիստափոր Հապոյեան, Ընկերային Ծառայութեան Խորհուրդի ատենապետ տոքթ. Պերճ Գասապեան, խորհուրդի անդամներ տոքթ. Թագուհի Թաշճեան եւ տիար Փիէռ Մուսալլի:
Պատուիրակութիւնը այցելեց Ռազի հիւանդանոցի նորանշանակ տնօրէն տոքթ. Ռըզք Ալլա Մալոյին, երիկամներու հիւանդանոցի տնօրէն տոքթ. Մուզհէր Շաաիէի եւ Սան Լուիս Ֆրիշօ հիւանդանոցի տնօրէն տոքթ. Շաքէր Գասթանի: Վերջին հանդիպումին ներկայ գտնուեցաւ նաեւ հիւանդանոցի պատասխանատու մայրապետ քոյր Սամիէ:
Պատուիրակութեան անդամները նորանշանակ տնօրէններուն հետ մտերմիկ հանդիպում ունենալով Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեանի ողջոյններն ու բարեմաղթութիւնները փոխանցեցին: Հանդիպումներու ընթացքին, Ընկերային Ծառայութեան Խորհուրդի անդամները անդրադարձան առողջապահական ոլորտէն ներս թեմի զաւակներուն մատուցուող մարդասիրական օժանդակութիւններուն: Արծարծուեցան յառաջիկային առողջապահական գետնի վրայ փոխգործակցութեան կարելիութիւնները:
Նորանշանակ տնօրէնները այցելութիւններուն առիթով իրենց ուրախութիւնն ու շնորհակալութիւնը յայտնեցին պատուիրակութեան անդամներուն եւ գործակցութեան պատրաստակամութեամբ ողջունեցին թեմէն ներս տարուող մարդասիրական աշխատանքները:
Պատուիրակութեան անդամները կրկին շնորհաւորեցին եւ բարեյաջող գործունէութիւն մաղթեցին նորանշանակ տնօրէն բժիշկներուն, որոնց մասնագիտական հետապնդումով Հալէպի առողջապահական մարզը առաւել կը բարելաւուի եւ կը պայծառանայ: